Tehrandan Ağ Evə təhdid: Hücumları cavabsız qoymayacağıq

"Döyüş meydanındakı məğlubiyyətlərinə baxmayaraq, ABŞ bizim qətiyyətimizi sınamaq qərarına gəlib. Güclü silahlı qüvvələrimiz heç bir hücumu və ya təhdidi cavabsız qoymayacaq".

Ölkə.az xəbər verir ki, bunu İranın xarici işlər naziri Abbas Əraqçi X (tvitter) hesabında ABŞ-nin İrana hücumlarını şərh edərkən deyib.

Əraqçi xarici qoşunları təhlükədə olduqları barədə xəbərdarlıq edərək onları Hörmüz boğazını və ətraf əraziləri tərk etməyə çağırıb.

"Hörmüz boğazı beynəlxalq sular deyil, İran və Oman arasında paylaşılır... Ərazimizin yaxınlığında yerləşən xarici qoşunlar insan səhvləri, sadə qəzalar və ya çarpaz atəşə tutulma təhlükəsi səbəbindən daim risk altındadırlar. Riski azaltmaq üçün onlar üçün ən yaxşı həll yolu bölgədən getmək olardı.Təhlükəsiz olmaq istəyirsinizsə, bölgəmizi tərk edin", - Əraqçi yazıb.
“Tasnim” SEPAH-ın İranın bölgədəki ABŞ hədəflərinə raket və dronlar atdığı barədə açıqlamasını yayıb.

ABŞ-ın yeni hücumlarından sonra İran qüvvələri bölgədəki Amerika hərbi bazalarına hücum etdi. İran Silahlı Qüvvələrinin Mərkəzi Qərargahı Həzrəti Xatəm əl-Ənbiya əmin edib ki, təcavüz təkrarlanarsa, cavab daha da geniş miqyaslı olacaq.

Press TV-nin verdiyi məlumata görə, qərargahın açıqlamasında deyilir: "Amerika ordusu İran İslam Respublikasına qarşı hər hansı bir təcavüzü təkrarlayarsa, bölgədəki konkret hədəflərə daha ciddi və genişmiqyaslı hücumlar həyata keçirəcəyini bilməlidir".

“Axios”un məlumatına görə,  İran çərşənbə günü səhər Bəhreyn, Küveyt və İordaniyadakı ABŞ bazalarına ən azı dörd ballistik raket və bir neçə dron atıb.

 Mürtəza