İran bu dəfə Maskı hədələdi - Şirkətlərini hədəfə alacaq

İran ABŞ-yə qarşı cavab tədbirləri çərçivəsində İlon Maskın Yaxın Şərqdəki bütün şirkətlərini, o cümlədən “SpaceX”in “Starlink” peyk internet xidmətini hərbi hədəf elan edib.

“Ölkə.az” xəbər verir ki, bu barədə “Fars” agentliyi məlumat yayıb.

Məlumata görə, Tehran rəhbərliyi Qərbi Asiyada İlon Maska məxsus iqtisadi holdinqlərlə bağlı olan bütün şirkətləri, xüsusən də regiondakı “Starlink” yerüstü stansiyasını hədəfə alacaq.
Məlumatlı mənbəyə istinadən bildirilir ki, ABŞ ordusu həm hava hücumu dronlarında, həm də pilotsuz dəniz kəşfiyyat gəmilərində Maskın texnologiyalarından istifadə etməklə İrana qarşı müharibə cinayətləri törədib. Bu səbəbdən İslam Respublikası regionda sözügedən şirkətə aid olan bütün obyektləri vurmaq hüququnu özündə saxlayır.

Qeyd edək ki, İran tərəfindən gələn bu hədə bəyanatı ABŞ Prezidenti Donald Trampın dünən “Truth Social” hesabında İrana qarşı “çox ağır zərbələr” endiriləcəyi barədə xəbərdarlığı ilə eyni vaxta təsadüf edib. Tramp həmçinin ABŞ-nin tezliklə İranın əsas neft ixracat mərkəzi olan Xarq adasını və digər strateji neft infrastrukturlarını nəzarətə götürəcəyini elan edib. O, “Fox News”a müsahibəsində ötən gecə İrana 250 milyon dollar dəyərində bomba atdıqlarını da qeyd edib.

Xatırladaq ki, ki, iki ölkə arasında gərginlik ABŞ ordusuna məxsus helikopterin Hörmüz boğazında vurulmasından sonra pik həddə çatıb. Vaşinqton buna görə Tehranı ittiham edərək ard-arda raket zərbələri endirib.