ABŞ Türküstan ölkələrinin minerallarına yaxınlaşır

Dünən Astanada Mərkəzi Asiya və ABŞ nümayəndələrinin iştirakı ilə C5+1 “Kritik minerallar dialoqu”nun ikinci iclası keçirilib.

"Ölkə.az" xəbər verir ki, ABŞ nümayəndə heyətinə ABŞ prezidentinin Cənubi və Mərkəzi Asiya üzrə xüsusi elçisi Sercio Qor rəhbərlik edib.

"Kritik minerallar gündəlik ehtiyaclarımız və texnologiyalarımız üçün vacibdir - onlar infrastrukturu, sənayeni və milli müdafiəni dəstəkləyir. Prezident Tramp Mərkəzi Asiyanın həlledici rolunu dərindən başa düşür. Etibarlı C5 tərəfdaşları ilə sıx tərəfdaşlıq çərçivəsində biz bu resurslara sabit çıxışı təmin etmək, eləcə də davamlı, şəffaf və bazara yönəlmiş təchizat zəncirləri yaratmaq üçün çalışırıq", - S.Qor X sosial media hesabında yazıb.

“The Astana Times” qəzetinin məlumatına görə, Qor çıxışı zamanı Mərkəzi Asiyanın "ABŞ-dan layiq olduğu diqqəti almadığını" və Donald Tramp administrasiyasının Mərkəzi Asiyanı etibarlı tərəfdaş və artan strateji əhəmiyyətə malik bir bölgə kimi gördüyünü bildirib.

"Mərkəzi Asiya bizim üçün çox vacibdir. Biz əməkdaşlıq etmək, tərəfdaşlığı gücləndirmək və həm ABŞ-a, həm də bu region ölkələrinə fayda verəcək imkanları müəyyən etmək istəyirik", - deyə ABŞ prezidentinin xüsusi nümayəndəsi bildirib.

Qor bildirib ki, bu, həmçinin telekommunikasiya, infrastruktur və bağlantı sahəsindəki imkanları, o cümlədən Transxəzər dəhlizi boyunca imkanları da tanıyır. “Biz inanırıq ki, bu dəhliz 21-ci əsrin müəyyənedici ticarət yollarından birinə çevrilmək potensialına malikdir”.(musavat.com)