Acun İlıcalıdan Prezident Ərdoğana xüsusi hədiyyə: “Məni çox qürurlandırdı və xoşbəxt etdi”
Türkiyənin tanınmış televiziya rəhbəri və İngiltərənin “Hull City” futbol klubunun sahibi Acun Ilıcalı Prezident Rəcəb Tayyib Ərdoğana xüsusi hədiyyə təqdim edib.
Ölkə.az xəbər verir ki, Prezident Administrasiyasında baş tutan görüş zamanı Acun Ilıcalı Ərdoğana “Hull City”nin xüsusi formasını hədiyyə edib. Formanın üzərində Prezidentin adı və məşhur “10” nömrəsi yer alıb.
Görüşdən sonra açıqlama verən Acun Ilıcalı bu anın onun üçün böyük mənəvi əhəmiyyət daşıdığını bildirib:
“Bu məni çox qürurlandırdı və xoşbəxt etdi”.
İlıcalı qeyd edib ki, İngiltərə futbolunda mühüm uğura imza atan “Hull City”nin Türkiyə ilə əlaqələrinin güclənməsi onun üçün xüsusi önəm daşıyır. O, klubun son illərdə Türkiyədə də böyük azarkeş kütləsi qazandığını vurğulayıb.
Qeyd edək ki, Acun Ilıcalının sahibi olduğu “Hull City” bu mövsüm uğurlu çıxışı ilə yenidən İngiltərə Premyer Liqasına vəsiqə qazanıb. Bu münasibətlə Türkiyədə də geniş təbriklər alan iş adamı son günlər Prezident Ərdoğanla bir neçə tədbirdə bir araya gəlib.
Sosial şəbəkələrdə böyük maraq doğuran görüşdən yayılan fotolarda Acun Ilıcalının Prezident Ərdoğana təqdim etdiyi sarı-qara rəngli “Hull City” forması diqqət mərkəzində olub.(musavat)
