"Putinin qərarından asılıdır" - Zelenski Abramoviçin mümkün missiyasından danışdı

Rusiyalı oliqarx Roman Abramoviç Rusiya ilə Ukrayna arasında aparılan danışıqlarda vasitəçi rolunu oynaya bilər. Lakin bunun reallaşıb-reallaşmayacağı Kremlin rəhbəri Vladimir Putinin qərarından asılıdır.

"Ölkə.az" xəbər verir ki, bu barədə Ukrayna Prezidenti Volodimir Zelenski "Reuters NEXT Europe" sammitində Roman Abramoviçin mümkün vasitəçiliyi ilə bağlı sualı cavablandırarkən danışıb.

Zelenski bildirib ki, Putinin artıq bu məsələ ilə bağlı öz qərarları var. Onun sözlərinə görə, Abramoviç Kiyevə səfəri zamanı onunla "çox konkret və detallı dialoq" aparıb və böyük ehtimalla Ukrayna tərəfinin mövqeyini tam şəkildə anlayıb.

Ukrayna Prezidenti qeyd edib ki, Abramoviç görüşdən sonra Moskvaya gedərək bu mövqeni Kremlə çatdıracağını vəd edib.

"O, belə bir şəxs ola bilər, lakin bu, Putindən asılıdır. Çünki hər bir ölkə texniki səviyyədə və ya milli təhlükəsizlik üzrə müşavirlər səviyyəsində onu kimin təmsil edəcəyinə özü qərar verməlidir", - deyə Zelenski vurğulayıb.

Xatırladaq ki, bir müddət əvvəl Rusiya Prezidenti Vladimir Putin Ukrayna Prezidenti Volodimir Zelenskinin məktubuna münasibət bildirərək, Ukraynanın "Rusiya işgüzar dairələrinin nümayəndəsini Kiyevə danışıqlara dəvət etdiyini" açıqlamışdı.

Daha sonra həmin şəxsin rusiyalı oliqarx Roman Abramoviç olduğu məlum olmuşdu. Zelenskinin sözlərinə görə, Abramoviç Kiyevə Moskvadan ismarışla gəlib.(oxu.az)