Paşinyanın qələbəsinə etiraz - Müxalifət nəticələrin ləğvini tələb edir

Ermənistanda keçirilən parlament seçkilərində iştirak etmiş 7 siyasi qüvvə səsvermənin nəticələrinin ləğv edilməsi və ya yenidən baxılması tələbi ilə ölkənin Konstitusiya Məhkəməsinə müraciət edib.

Ölkə.az “Armenia Today”ə istinadla xəbər verir ki, bu barədə məlumat məhkəmə instansiyasının rəsmi saytında yer alıb.

“Çiçəklənən Ermənistan”, “Birlik qanadları”, “Demokratiya, qanun, nizam”, “Yeni qüvvə” partiyaları, həmçinin “Respublika naminə” və “Ermənistan” blokları Mərkəzi Seçki Komissiyasının (MSK) elan etdiyi nəticələrin tamamilə ləğv olunması üçün ərizə veriblər. “Güclü Ermənistan” bloku isə məhkəmədən ya nəticələrin ləğvini, ya da səsvermənin ikinci turunun təyin edilməsini tələb edib.

Ermənistan qanunvericiliyinə görə, Konstitusiya Məhkəməsinin bu müraciətlərə baxıb-baxmayacağı ilə bağlı qərar vermək üçün cəmi iki gün vaxtı var. Əgər iddialar icraata qəbul edilərsə, onlar konkret məruzəçi hakimlərə təhvil veriləcək. Bu halda məhkəmə prosesi şifahi formada keçiriləcək və müddəti 15 gündən çox çəkməyəcək.

Qeyd edək ki, Ermənistanda parlament seçkiləri iyunun 7-də keçirilib, rəsmi nəticələr isə bir həftə sonra açıqlanıb. MSK-nın hesablamalarına əsasən, Milli Məclisə (parlamentə) cəmi 3 siyasi qüvvə keçə bilib: Baş nazir Nikol Paşinyanın “Vətəndaş müqaviləsi” partiyası (49,7%, 64 mandat), “Güclü Ermənistan” bloku (23,3%, 29 mandat) və “Ermənistan” bloku (9,9%, 12 mandat).

Xatırladaq ki, bundan əvvəl Nikol Paşinyan müxalifətə parlamentdə “inqilab etməyi” təklif etmişdi.(qafqazinfo)