Kiyevdən Moskvaya bəd XƏBƏR: Sibirdəki neft bazalarını da vuracaqlar

Ukrayna Prezidenti Volodimir Zelenski Rusiyaya qarşı hücumların daha da gücləndiriləcəyini bəyan edib.

Ölkə.az xəbər verir ki, bunu dövlət başçısı xarici mətbuata müsahibəsində deyib.

Rusiyaya gündəlik hücumların ədalətli cavab olduğunu vurğulayan V.Zelenski bildirib: “Bu, həm xalqımızın, həm də mənim üçün haqlı qəzəb, emosiyadır. Amma qəzəbdən sonra nəsə gəlməlidir. Onlar bunu hiss etməlidirlər”.

Ukrayna lideri söyləyib ki, Rusiya cəmiyyəti hələ də Prezident Vladimir Putinin başlatdığı müharibənin nəticələrini tam hiss etməyib.

“Onlar bizə hər gün hücum edirlər və biz də hər gün cavab verəcəyik. Əlbəttə ki, hər gün artan güc olacaq”, - V.Zelenski vurğulayıb.

O, həmçinin Rusiyanın Tümen bölgəsində, 2070 km məsafədə yerləşən neft emalı zavoduna edilən son hücumdan da bəhs edib. Dövlət başçısı vurğulayıb ki, Ukrayna artıq 3000 km-dən çox məsafəyə uça bilən yeni dronlar hazırlayıb:

“Bunlar yeni dronlardır, yaxşı dronlardır. Biz daha da irəli gedəcəyik. Çünki onların bütün hərbi obyektlərinin, fabriklərinin, neft anbarlarının, qaz anbarlarının və s. harada yerləşdiyini başa düşürük. Daha uzaq məsafələrə zərbə endirə bilən silahlarımız olmalıdır və biz bunu edirik”.

Mürtəza