Rusiyada ciddi yanacaq böhranı - Aviasiya şirkətlərindən hökumətə çağırış
Ölkə.az “Kommersant”a istinadən xəbər verir ki, buna son vaxtlar Ukrayna ordusunun Rusiyanın enerji obyktlərinə endirdiyi zərbələr səbəb olub.
An-2 Operatorları Assosiasiyasının prezidenti Vladimir Antonov artan yanacaq çatışmazlığı fonunda reaktiv yanacaq və aviasiya benzininin qiymətlərinin dövlət tərəfindən tənzimlənməsini təklif edib. O bildirib ki, sərnişin aviaşirkətləri artıq ümumi yanacaq xərclərinin üçdə birindən çoxunu yanacağa xərcləsələr də, bu pay kiçik təyyarələr üçün daha yüksəkdir. “Bu da nəqliyyat iqtisadiyyatına, xidmətlərə tələbata və sərnişin daşınmasına mənfi təsir göstərir”, - o vurğulayıb.
Assosiasiyanın Nəqliyyat Nazirliyinə ünvanladığı məktubda bildirilir ki, aviasiya benzini ilə bağlı vəziyyət xüsusilə kəskindir və qiymətlərin artması bazar iştirakçılarını aşağı keyfiyyətli yanacaq da daxil olmaqla avtomobil yanacağından istifadə etməyə məcbur edir.
Aviasiya İşləri Assosiasiyasının icraçı direktoru Vadim Tsıqanov vəziyyətin hələ kritik olmadığını, lakin bu istiqamətdə irəlilədiyini və məsələnin bir ay ərzində kəskinləşəcəyini söyləyib.
Kiçik Aviasiya Müəssisələri Assosiasiyasının İdarə Heyətinin sədri Sergey Detenışev xəbərdarlıq edib ki, potensial dövlət qiymət tənzimlənməsi tələb və təklif arasındakı disbalansı daha da artıra bilər. “Qiymət məcburi şəkildə aşağı düşə bilər, amma yanacaq olmayacaq”, - o vurğulayıb.
“Kommersant”ın yazdığına görə, sərnişin aviaşirkətləri də yanacaq vəziyyətindən narahatdırlar.
“Reuters” isə xəbər verir ki, iyun ayında Ukraynanın Rusiya neft emalı zavodlarına müntəzəm olaraq dron hücumları nəticəsində ölkədə benzin istehsalı əvvəlki ilə nisbətən 25% azalıb. Bu arada, Rusiyanın mərkəzində, Kirişi, Moskva, Nijni Novqorod, Ryazan və Yaroslavldakı əsas neft emalı zavodlarına edilən hücumlardan sonra neft emalı faktiki olaraq dayandırılıb. Bu zavodlar ölkənin benzininin 30%-dən çoxunu və dizel yanacağının təxminən 25%-ni istehsal edirdi. Hökumət yanacaq çatışmazlığını Belarusdan tədarükü artırmaqla, dəniz yolu ilə idxalı açmaqla və keyfiyyət standartlarını Avro-3 standartına endirməklə kompensasiya etmək qərarına gəlib.
Mürtəza
