Futbol oynamaq üçün Rusiyaya gəldi, müharibəyə göndərildi

19 yaşlı kamerunlu futbolçu Mevunqu Mbe Stevis Astrid Rusiyanın "Ural" futbol klubunun akademiyası ilə müqavilə imzalamaq üçün ölkəyə gəldiyini, lakin nəticədə özünü hərbi əməliyyatlarda tapdığını iddia edib. 

Ölkə.az xəbər verir ki, bu barədə "E1.ru" portalı məlumat yayıb.

Məlumata görə, 2025-ci ildə idmançı qardaşı və dostu ilə birlikdə Rusiya klubunun vasitəçisi olduğunu iddia edən bir şəxs ilə tanış olub. Həmin şəxs onlara gələcək müqavilə ilə bağlı sənədlər imzalamağı təklif edib və Moskva üçün bilet alıb.

Futbolçuların sözlərinə görə, Moskvaya çatdıqdan sonra onlar futbol akademiyası əvəzinə hərbi komissarlığa aparılıblar. Stevis bildirib ki, onları müşayiət edən şəxs imzalanan sənədlərin əslində hərbi xidmət müqaviləsi olduğunu deyib. Onlara həmçinin xidmətdən sonra futbol karyerasına qayıda biləcəkləri vəd edilib.

Futbolçunun sözlərinə görə, həmin vaxt o, Kamerunun "Canon Yaounde” klubunda çıxış edib. Özünü "Ural”ın nümayəndəsi kimi təqdim edən şəxs ona baxış təşkil edəcəyini və bunun nəticəsində akademiya ilə müqavilə imzalana biləcəyini vəd edib. Bütün sənədlərin rus dilində olduğu, futbolçuların isə bu dili bilmədiyi qeyd olunur.

"E1"in məlumatına görə, Stevis müharibədə "Maksimka” çağırış adı ilə şturmçu kimi xidmət edib. Müqavilə bitdikdən sonra o, təkbaşına Yekaterinburqa qayıdıb. Onun sözlərinə görə, dostu döyüşlərdə həlak olub, qardaşı isə əsir düşüb.(qaynarinfo)