Aİ ucuz bağlamalar üçün rüsumsuz rejimi ləğv etdi

Avropa İttifaqı (Aİ) bloka daxil olmayan ölkələrdən gələn və dəyəri 150 avrodan az olan bağlamalar üçün rüsumsuz rejimi ləğv edib.

"Ölkə.az" xəbər verir ki, iyulun 1-dən etibarən belə göndərişlər üçün sabit rüsum tətbiq olunacaq.

Qaimədə qeyd olunan hər bir mal kodu üçün ona aid olan məhsulların sayından asılı olmayaraq, 3 avro məbləğində rüsum tələb ediləcək. Bu yeni tədbir böyük bir hissəsi "Shein" və "Temu" kimi elektron ticarət platformalarından sifariş edilən ucuz məhsulların Avropa bazarına axınını məhdudlaşdırmağa xidmət edir.

Ötən il ərzində Aİ ölkələrinə onlayn mağazalardan alınmış 6 milyarda yaxın məhsul idxal olunub. Dəyəri 150 avrodan ucuz olan bağlamaların təqribən 90%-i Çindən göndərilib. Aİ bəyan edir ki, rüsumun tətbiq edilməsi qərarı proteksionist xarakter daşımır. Bu addım bərabər rəqabət mühitinin yaradılması və məhsulların təhlükəsizliyinə nəzarətin gücləndirilməsi zərurəti ilə əlaqələndirilir. Bununla yanaşı, yeni qaydalar gömrük orqanlarının iş yükünü çoxaldacaq ki, bu da poçt göndərişlərinin çatdırılmasında ləngimələrə yol aça bilər.