İsveçin elektrik avtomobil istehsalçısı Amerika bazarını tərk edir - SƏBƏB

İsveçin elektrik avtomobil istehsalçısı Polestar Amerika bazarını tərk edəcək.

"Ölkə.az" xəbər verir ki, bu barədə "Bloomberg" məlumat yayıb.

Polestar 2017-ci ildə İsveçin Volvo Car AB və Çinin Zhejiang Geely Holding şirkətləri arasında birgə müəssisə kimi təsis edilib və 2021-ci ildə müstəqil bir şirkət kimi ictimaiyyətə açıqlanıb. Səhmləri 2021-ci ilin noyabr ayında ən yüksək həddə çatdığı vaxtdan bəri 20 dəfə düşüb.

Çinlə əlaqəsi olan şirkətlərə ABŞ-a tədarük qadağası qoyulub. Amerika hökuməti müasir avtomobillərin müxtəlif sensorlarla təchiz olunmasından və məlumat toplaya və sonra onu simsiz ötürə bilməsindən narahatdır.

May ayında Volvo bu qadağadan yayınıb, çünki şirkət Cənubi Karolinada Şimali Amerika bazarı üçün avtomobillər istehsal edir və həmçinin İsveçdən bir neçə model idxal edirdi. Daha əvvəl şirkətin baş direktoru Hakan Samuelsson Çinə məlumat ötürmədiyini iddia etmişdi.

Polestar da qadağadan azad olmaq üçün müraciət etsə də, ABŞ Ticarət Nazirliyi bu tələbi rədd edib.

Şirkətin açıqlamasında deyilir ki, şirkət mövcud avtomobil inventarını ABŞ dilerlərində satacaq və xidmət göstərməyə davam edəcək. ABŞ bazarından çıxdıqdan sonra qlobal satışlarının təxminən 80%-ni təşkil edən Avropaya diqqət yetirəcək.

Polestar səhmləri 12% ucuzlaşıb.

Elvin

Ölkə.az