Bu ölkədə zəlzələdə ölənlərin sayı artır, fəlakət böyüyür
Venesuelada baş verən güclü zəlzələlər nəticəsində ölənlərin sayı 589 nəfərə çatıb, 4300-dən çox insan yaralanıb.
Ölkə.az xarici mətbuata istinadən xəbər verir ki, bunu Venesuelanın müvəqqəti prezidenti Delsi Rodriqes bildirib.
Onun sözlərinə görə, xilasetmə işləri dayanmadan davam etdirlir, dəymiş ziyanın qiymətləndirilməsi aparılır. Ölən və yaralananların sayının artacağı istisna deyil. Hökumət rəsmiləri və xarici qurumlar rəqəmləri hər saat yeniləyirlər.
BMT-nin Humanitar İşlər üzrə Koordinasiya Ofisinin (OCHA) sözçüsü Yens Larkenin sözlərinə görə, dağıdıcı zəlzələlərin nəticələrinin aradan qaldırılmasına kömək etmək üçün 16 ölkədən təxminən 1000 xilasedici Venesuelaya göndərilib.
Onun sözlərinə görə, humanitar təşkilatlar hazırda Venesueladakı təbii fəlakətə təcili və geniş miqyasda reaksiya verir və hökumətə dəstək göstərirlər. Y.Larke vurğulayıb ki, zərərçəkmiş ərazilərdə axtarış-xilasetmə əməliyyatları və tibbi yardım prioritet olaraq qalır.
O, Cenevrədə keçirilən brifinqdə bildirib ki, fəlakətə dünyanın hər yerindən 25 qrup - həm axtarış-xilasetmə, həm də tibbi heyət cəlb olunub və onların sayı artacaq.
BMT rəsmisi axtarış-xilasetmə qruplarının Birləşmiş Krallıq, Almaniya, İordaniya, İspaniya, İtaliya, Qətər, Kolumbiya, Hollandiya, ABŞ, Fransa, Çexiya, Çili, İsveçrə və Ekvadordan göndərildiyini açıqlayıb.
O əlavə edib ki, tezliklə hadisə yerinə Meksika və Salvadordan əlavə yardım da gələcək.
Mürtəza
