Ukrayna "İsgəndər" raket istehsalı zavodunu vurdu: Zelenski təsdiqlədi - Video

**Ukrayna "Flaminqo" raketi ilə Rusiyanın Volqoqrad şəhərindəki "İsgəndər" raketlərini istehsal edən müəssisəyə zərbə endirib.**

Ölkə.az xəbər verir ki, Rusiya hərbi-sənaye kompleksinin əsas müəssisələrindən biri olan və "İsgəndər-M", "Topol-M" və "Yars" raket sistemlərini istehsal edən "Titan-Barrikadı" zavoduna hücum edilib.

Volqoqrad vilayətinin qubernatoru Andrey Boçarov Ukrayna raketlərinin şənbə gecəsi Volqoqradda yerləşən sənaye müəssisəsinə hücum etdiyini təsdiqləyib.

Boçarov bildirib ki, Volqoqradın Krasnooktyabrski rayonunda yerləşən müəssisələrdən birinin istehsal sahələrinə ziyan dəyib. "Hazırda on nəfərin xəsarət aldığı məlumdur", - deyə qubernator yazıb.

Ukrayna Prezidenti Vladimir Zelenski Volqoqraddakı Rusiyaya məxsus "Titan-Barrikadı" hərbi müəssisəsinin Ukraynanın "Flaminqo" raketləri ilə vurulduğunu təsdiqləyib.

Zelenski vurğulayıb ki, Ukraynaya qarşı müharibə üçün fəaliyyət göstərən hər bir Rusiya müdafiə obyekti Ukraynanın uzaqmənzilli zərbələri üçün qanuni hədəfdir.

"Ukraynanın uzaqmənzilli zərbələrinin coğrafiyası daim genişlənir. Məhz gündəlik təzyiqimiz sonda layiqli sülhün əldə edilməsinin təməlini qoyur. Uzaqmənzilli imkanlarımızı təmin edən hər bir ukraynalı mühəndisə və əsgərə minnətdaram", - o qeyd edib.

Mürtəza