Fransa ordusunda ilk: Məşhur general Rusiyaya qarşı

Fransa ordusunda ilk dəfə hərbi kəşfiyyatın sabiq rəhbəri quru qoşunlarının komandanı təyin olunub.

"Ölkə.az" xəbər verir ki yeni komandanın əsas missiyalarından biri Rusiyaya qarşı mümkün qarşıdurmaya hazırlığı gücləndirməkdir.

Fransanın silahlı qüvvələr naziri Ketrin Votren iyunun 18-də general Jak Lanqlad de Monqronun Fransa Quru Qoşunlarının yeni komandanı təyin edildiyini açıqlayıb. O, bu vəzifədə general Pyer Şilli əvəz edəcək.

Bu, Fransa ordusunun tarixində ilk belə təyinatdır. İndiyədək hərbi kəşfiyyatın sabiq rəhbəri ölkənin əsas qoşun növünə komandan təyin edilməmişdi.

Jak Lanqlad de Monqro 1-ci Paraşüt-Husar Alayında xidmət edib, Bosniya, Ruanda, Əfqanıstan və Mərkəzi Afrika Respublikasında əməliyyatlarda iştirak edib. O, uzun illər müdafiə nazirliyinin müxtəlif strukturlarında da çalışıb.

2022-ci ildə Hərbi Kəşfiyyat İdarəsinin (DRM) Rusiya-Ukrayna müharibəsinin miqyasını düzgün qiymətləndirə bilməməsindən sonra ona qurumu yenidən təşkil etmək tapşırılıb. General geniş islahatlar aparıb və ARTEMIS.IA platforması vasitəsilə süni intellekt texnologiyalarını kəşfiyyat sisteminə inteqrasiya edib.

Yeni komandanın qarşısına 2027-ci ilədək 20 min nəfərlik diviziyanın 30 gün ərzində döyüş hazırlığına gətirilməsi, 2030-cu ilədək isə koalisiya tərkibində 60 min nəfərlik ordu korpusuna rəhbərlik edilməsi vəzifəsi qoyulub. Bu plan 449 milyard avroluq altıillik müdafiə büdcəsi çərçivəsində həyata keçiriləcək. Proqrama SCORPION zirehli texnikaları, pilotsuz uçuş aparatları və sursat tədarükü də daxildir.

Məlumata görə, Fransa Rusiyanı əsas təhlükə hesab edir. Buna görə də hərbi kəşfiyyat sahəsində böyük təcrübəyə malik generalın ordunun rəhbərliyinə gətirilməsi ölkənin yeni hərbi strategiyasının mühüm hissəsi sayılır.

Yeddi övlad atası olan Jak Lanqlad de Monqro Fəxri Legion ordeninin kavaleridir.(musavat.com)