46 yaşlı avstraliyalının çamadanından gənc qızın cəsədi çıxdı

Tailandda 46 yaşlı Avstraliya vətəndaşı 17 yaşlı qızın qətlində şübhəli bilinərək saxlanılıb.

"Ölkə.az" xəbər verir ki, şübhəli şəxs Banqkokdakı Suvarnabhumi hava limanında Avstraliyanın Pert şəhərinə uçan Jetstar təyyarəsinə minməyə hazırlaşarkən saxlanılıb. 

Müstəntiqlər şübhəlinin yeniyetmənin itkin düşməsi və ölümündə iştirak edə biləcəyinə inanırlar. Hüquq-mühafizə orqanlarının məlumatına görə, həmin şəxs səhər saatlarında bir qadınla birlikdə Pattayadakı yaşayış binasına girib. Bir neçə saat sonra o, binadan böyük qara çamadanla çıxıb və onu motosikletlə daşıyıb.

Çamadan daha sonra dəmir yolu relslərinin yaxınlığında tapılıb. Onun içərisində üzərində zorakılıq əlamətləri olan bir qızın cəsədi olub.

Saxlanılan şəxs qətl və adam oğurluğu ilə bağlı hər hansı bir əlaqəsini inkar edir.

Hazırda məhkəmə-tibbi ekspertizanın nəticələri gözlənilir və bundan sonra müstəntiqlər yetkinlik yaşına çatmayan şəxsin qaçırılması, qətl, cəsədin gizlədilməsi və cinsi cinayət kimi ittihamlar irəli sürə bilərlər.

Avstraliya Xarici İşlər Nazirliyi saxlanılan vətəndaşa konsulluq yardımı göstərdiyini təsdiqləyib.

Elvin

Ölkə.az