Amerikada qırmızı həyəcan: Hava temperaturu 46 dərəcəyə çatacaq
ABŞ 4 İyul – Müstəqillik Günü tətilinə hazırlaşarkən, ölkənin böyük hissəsini əhatə edən güclü istilər səbəbindən xəbərdarlıq vəziyyəti elan olunub.
Ölkə.az xəbər verir ki, Qərb ştatlarında ölümcül meşə yanğınları davam etdiyi bir vaxtda, Böyük Düzənliklərdən (Great Plains) Şimal-Şərq bölgələrinə qədər uzanan 35 ştatda təxminən 162 milyon nəfəri əhatə edən isti hava xəbərdarlıqları verilib.
Həftə ərzində təsirini daha da artıracağı gözlənilən istilərin bəzi bölgələrdə 35 dərəcəni, cənub və daxili ərazilərdə isə 40 dərəcəni keçəcəyi proqnozlaşdırılır. Yüksək rütubət səbəbindən hiss olunan temperaturun 40-46 dərəcəyə qədər yüksələ biləcəyi bildirilir.
Məlumata görə, təhlükəli hava şəraiti həftə boyu ölkənin mərkəzi bölgələrində davam edəcək, çərşənbə günündən etibarən isə Şimal-Şərq ştatlarına yayılaraq bayram həftəsi boyunca təsirini saxlayacaq.
Həmidə İbrahimova
