Ermənistan Rusiyanı qıcıqlandırmağa davam edir

"Ölkə.az" xəbər verir ki, bu barədə Ermənistanın baş naziri Nikol Paşinyan hökumətin iclasından sonra keçirilən brifinqdə bildirib.

Paşinyanın sözlərinə görə, Rusiyanın tətbiq etdiyi ticarət məhdudiyyətləri Ermənistan kənd təsərrüfatı məhsullarının başqa bazarlara yönləndirilməsini zəruri edib. Bu məqsədlə ölkədə İxracın Dəstəklənməsi Agentliyinin yaradılması prosesi başlanıb. Qurumun fəaliyyətinə maliyyə dəstəyini də Avropa İttifaqı göstərəcək.

Baş nazir qeyd edib ki, Aİ-nin ayıracağı 18 milyon avroluq maliyyə yardımını gözləmədən hökumət artıq müvafiq infrastrukturun formalaşdırılmasına başlayıb.

"Bu dəstək artıq həyata keçirilir. İxracın Dəstəklənməsi Agentliyinin yaradılması prosesi gedir və yaxın vaxtlarda qurum fəaliyyətə başlayacaq", – deyə Paşinyan bildirib.

Avropa Komissiyasının sədri Ursula fon der Lyayen isə İrəvanda keçirdiyi mətbuat konfransında Ermənistanın ixrac potensialının artırılmasının vacibliyini vurğulayaraq bildirib:

"Yaxın vaxtlarda ticarətin şaxələndirilməsinə kömək etmək üçün əlavə 18 milyon avro alacaqsınız. Bu vəsait, məsələn, İxracın Dəstəklənməsi Agentliyinin yaradılmasına sərf oluna bilər", – deyə o qeyd edib.

Fon der Lyayenin sözlərinə görə, bu vəsait Aİ-nin Ermənistan üçün nəzərdə tutduğu 52 milyon avroluq yardım paketinin son hissəsidir.

Xatırladaq ki, Rusiyanın Baytarlıq və Fitosanitar Nəzarət Xidməti (Rosselxoznadzor) iyunun 12-dən etibarən Ermənistandan Rusiyaya bütün karantin nəzarətində olan məhsulların idxalına məhdudiyyət tətbiq edib. Qadağa həmçinin bu məhsulların Rusiya ərazisindən keçməklə Avrasiya İqtisadi İttifaqı (Aİİ) ölkələrinə tranzitinə də şamil olunub.

Məhdudiyyətlərdən sonra Ermənistan hökuməti Rusiya ilə danışıqlara başlayıb. Daha sonra Baş nazir Nikol Paşinyan ixrac qadağalarından zərər çəkmiş fermerlərə kompensasiya ödəniləcəyini açıqlayıb. Ermənistanın iqtisadiyyat naziri Gevorq Papoyan isə ölkəsinin ixrac maneələri ilə bağlı Avrasiya İqtisadi Komissiyasına müraciət etdiyini bildirib.

Qeyd edək ki, bu proses Moskva ilə İrəvan arasında fikir ayrılıqlarının davam etdiyi bir vaxta təsadüf edir. Ermənistan Aİİ üzvü olaraq qalsa da, paralel şəkildə Avropa İttifaqı ilə yaxınlaşma siyasətini davam etdirir. 2025-ci ilin əvvəlində Ermənistan hakimiyyəti ölkənin Avropa İttifaqına inteqrasiya prosesinin başlanmasına dair qanun layihəsini təsdiqləyib.

Rusiya dəfələrlə bəyan edib ki, Ermənistanın eyni vaxtda həm Aİİ-də qalması, həm də Avropa İttifaqına inteqrasiya etməsi mümkün deyil. Nikol Paşinyan isə Aİİ-dən çıxmaq məsələsinin gündəmdə olmadığını bildirsə də, ölkənin gələcək xarici siyasi kursunun yalnız ümumxalq referendumu ilə müəyyən edilə biləcəyini vurğulayıb.

May ayında Astanada keçirilən Aİİ sammitinin yekununda Rusiya, Belarus, Qazaxıstan və Qırğızıstan liderləri Ermənistanda ölkənin Aİİ-də qalması və ya Avropa İttifaqına inteqrasiya yolunu seçməsi ilə bağlı ümumxalq referendumunun keçirilməsinin vacibliyini bəyan ediblər.(musavat.com)