İtaliya Aİ-nin Rusiyanın patriarxına qarşı sanksiyaları dəstəkləmədi

Ölkə.az xəbər verir ki, bu barədə "Politico" nəşrinin mövzu ilə tanış olan Avropa diplomatlarına istinadən məlumat yayıb.

Məlumata əsasən, Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas Aİ-nin 21-ci sanksiyalar paketi çərçivəsində Patriarx Kirillə qarşı məhdudiyyətlərin tətbiqini təklif edib.

Lakin təşəbbüs əhalisinin əhəmiyyətli hissəsini pravoslav xristianların təşkil etdiyi Bolqarıstan tərəfindən etirazla qarşılanıb. "Politico"nun yazdığına görə, İtaliya da bu məsələyə qarşı çıxan ölkələr sırasındadır.

Nəşr qeyd edir ki, Roma rəsmi şəkildə veto tətbiq edəcəyi ilə hədələməsə də, "həllini tələb edən narahatlıqlarını" ifadə edib.

Mənbələrin bildirdiyinə görə, İtaliya tərəfinin narahatlığı Vatikanın mövqeyi ilə əlaqədardır və xristian dini konfessiyasının liderinə qarşı sanksiyaların tətbiqinin mümkün nəticələri ilə bağlıdır.

Bundan əvvəl Bolqarıstanın baş naziri Rumen Radev ölkəsinin milli maraqlarına zərər verə biləcək anti-Rusiya sanksiyalarını dəstəkləmək istəmədiyini bəyan etmişdi. O, buna misal olaraq Patriarx Kirillə, eləcə də "Lukoyl" şirkətinin təsisçisi Vahid Ələkbərova qarşı sanksiya təkliflərini göstərmişdi.

İyunun 19-da Bolqarıstan sözügedən sanksiyalar paketinə veto qoyub.(Qaynarinfo)