Trampın Ankara səfəri – 1000 nəfərlik heyət, helikopter...
ABŞ Prezidenti Donald Tramp və dünya liderləri 22 ildən sonra ilk dəfə Ankaranın ev sahibliyi ilə keçiriləcək tarixi 36-cı NATO Zirvə toplantısında iştirak etmək üçün Türkiyədə olacaqlar. Bu kontekstdə Ankarada müəyyən təhlükəsizlik tədbirləri görülüb və liderləri müşayiət edən komandalar və nəqliyyat vasitələri öz xüsusiyyətləri ilə diqqət çəkir.
Ölkə.az xəbər verir ki, zirvə görüşündə iştiraka damğa vuracaq lider isə ABŞ Prezidenti Donald Tramp olacaq.
Zirvə toplantısında iştirak etmək üçün Ankaraya səfər edəcək ABŞ Prezidenti Donald Trampın səfər proqramı ilə bağlı yeni detallar ortaya çıxıb. Tramp Ankaraya onu müşayiət edəcək təxminən 1000 nəfərlik heyətlə gələcək.
Ankaraya təyin olunmuş komandaların bir çoxu zirvə toplantısından əvvəl şəhərə gələcək. Logistika və təhlükəsizlikdən məsul olan bu ilkin komandalar ilk tapşırıqlarını paytaxt Ankarada yerinə yetirəcəklər.
Zirvə toplantısında iştirak edəcək Tramp Qətər tərəfindən bu yaxınlarda hədiyyə edilən Boeing 747-8 təyyarəsi, yəni Air Force One ilə gələcək.
Təyyarədə prezidenti müşayiət edən şəxslər arasında qərargah rəisləri, milli təhlükəsizlik müşaviri, mətbuat katibi, çıxış müəllifləri qrupu, Məxfi Xidmət agentləri, eləcə də ABŞ Hərbi Hava Qüvvələri və Dəniz Qüvvələrinin şəxsi heyəti olacaq.
500 milyon dollar dəyərində olan təyyarə ABŞ Hərbi Hava Qüvvələri tərəfindən konversiya layihəsinə məruz qalmışdı.
Hər səfərdə olduğu kimi, Tramp da Ankaraya öz avtomobilləri ilə gələcək. Trampın karvanında olması gözlənilən nəqliyyat vasitələrindən biri də Marine One helikopteridir.
ABŞ prezidentinin qısa məsafəli səfərlər üçün istifadə etdiyi helikopter hissə-hissə yük təyyarələri ilə Ankaraya gətiriləcək. Helikopter Ankarada ABŞ xüsusi təyinatlı qüvvələri tərəfindən yığılacaq və Trampın istifadəsinə veriləcək.
Trampın rəsmi avtomobili olan Cadillac da onu müşayiət edəcək. "The Beast" adlı nəqliyyat vasitəsi Ankarada istifadə olunacaq.
"The Beast" avtomobili Tramp üçün xüsusi olaraq modifikasiya edilib. Beşqat zirehinə görə bu avtomobil dünyanın ən təhlükəsiz avtomobillərindən biri kimi tanınır.
Trampın Ankara səfəri Anıtqəbirə (Atatürk məqbərəsi) ziyarətlə başlayacaq, daha sonra Beştəpədə Prezident Sarayında Prezident Rəcəb Tayyib Ərdoğan tərəfindən rəsmi olaraq qarşılanacaq. Beştəpə marşrutu boyunca Trampın karvanını süvari qoşunların da müşayiət etməsi planlaşdırılır.
Rəsmi qarşılanma mərasimindən sonra Ərdoğan və Trampın təkbətək görüş keçirməsi, daha sonra isə nümayəndə heyətləri arasında görüşün keçirilməsi gözlənilir.
Danışıqlarda Türkiyənin F-35 proqramına yenidən daxil edilməsi, milli KAAN qırıcı təyyarəsində istifadə ediləcək F-110 mühərriklərinin alınması, Suriya və Qəzzada baş verən hadisələr və iki ölkə arasında müdafiə əməkdaşlığı da daxil olmaqla bir sıra vacib məsələlərin müzakirə olunacağı gözlənilir.
Liderlərin danışıqlardan sonra müxtəlif müqavilələr imzalaması və birgə mətbuat konfransı keçirməsi də gözlənilir.
Mürtəza
