Rusiya: Strateji əhəmiyyətli Ukrayna şəhərini ələ keçirdik, Kiyev təkzib edir

Rusiya ordusu Donetsk vilayətində strateji əhəmiyyət kəsb edən Kostantinovka şəhərini ələ keçirib.

Ölkə.az xəbər verir ki, bunu Rusiya Prezidenti Vladimir Putin bəyan edib.

Rusiya Baş Qərargah rəisi Valeri Gerasimov hərbi komandanlıqla görüş zamanı Putinə Rusiya qoşunlarının guya Kostantinovka üzərində nəzarəti ələ keçirdiyini bildirib.

Onun sözlərinə görə, şəhər Donetsk vilayətində Ukrayna müdafiəsinin əsas möhkəmləndirilmiş ərazilərindən biridir.

Putin Kostantinovkanı Donbasın mühüm nəqliyyat və sənaye mərkəzi adlandırıb və onun ələ keçirilməsini strateji nailiyyət kimi qiymətləndirib.

Rusiya Müdafiə Nazirliyi də şəhərdə çəkildiyini iddia etdiyi video və fotoşəkilləri dərc edib.

Putin həmçinin Ukraynanın Rusiya ərazisinə uzaq məsafədən zərbələr endirdiyini qeyd edərək sərhəd boyunca sözdə "təhlükəsizlik zonası"nın genişləndirilməsinin vacibliyini bildirib.

Rusiya müdafiə naziri Andrey Belousov da Kostantinovkanın ələ keçirilməsi ilə bağlı ordu birləşmələrini təbrik edib.

"Cəsarətli və qətiyyətli hərəkətləriniz bizə düşməni uğurla geri itələməyə imkan verir və Cənub Qüvvələr Qrupunun ümumi irəliləyişinə böyük töhfə verir", – nazir Telegram kanalında yazıb.

Ukrayna Silahlı Qüvvələri Baş Qərargahının mətbuat katibi mayor Andrey Kovalev isə bildirib ki, Kostantinovkanın işğalı ilə bağlı məlumatlar həqiqətə uyğun deyil.