"Rus Evi" Kişineuda fəaliyyətini dayandırır
Ölkə.az xəbər verir ki, bu barədə "Newsmaker" məlumat verib.
Rusiyanın Moldovadakı səfirliyi bildirib ki, qurumun bəzi funksiyaları diplomatik nümayəndəliyin mədəniyyət şöbəsinə veriləcək.
"Mərkəzin bağlanması Moldova hakimiyyətinin qərarıdır. Mərkəz uzun illər mədəni mübadilə, dialoq və təhsil əməkdaşlığı üçün platforma rolunu oynayıb. Bu qərardan təəssüf edirik. Ümid edirik ki, Moldovada rus dilinə, mədəniyyətinə və elminə maraq qorunub saxlanılacaq" - Səfirliyin məlumatında qeyd olunub.
Bu arada Dnestryanıda yeni "Rusiya evi"nin açılması müzakirə olunur. Tiraspol nümayəndələri Kişineuda "Rus Evi"nin fəaliyyətinin dayandırılmasından sonra belə bir strukturun yaradılmasına dari planlarını açıqlayıb. Moldova hökumət strukturları isə ikitərəfli razılaşma olmadan bu cür təşəbbüslərin heç bir hüquqi əsasının olmadığını qeyd ediblər.
Moldovanın Reinteqrasiya üzrə Baş nazirinin müavini belə bir mərkəzin yaradılması üçün hökumətlərarası razılaşma tələb olunduğunu bildirib, ölkənin mədəniyyət naziri isə xaricdə təhsil proqramları ilə bağlı riskləri qeyd edərək vətəndaşlar üçün mümkün nəticələrdən bəhs edib.
Kişineudakı "Rus Evi" 1998-ci il müqaviləsi əsasında 2009-cu ildən fəaliyyət göstərir. 2025-ci ildə Moldova hakimiyyəti təhlükəsizliklə bağlı narahatlıqları, o cümlədən ölkənin hava məkanının dronlar tərəfindən pozulmasını əsas gətirərək onu bağlamaq qərarına gəlib. Ötən ilin dekabr ayında Moldova Xarici İşlər Nazirliyi Rusiyaya müqavilənin ləğvi barədə rəsmi məlumat verib.(Teleqraf)
