Tramp İranın razılaşmaya hazır olduğunu, Tehran isə əksini deyir
Ölkə.az CNN-ə istinadən xəbər verir ki, bunu ABŞ Prezidenti Donald Tramp bildirib.
O, Türkiyədə keçirilən NATO sammitindən qayıdarkən “Air Force One” təyyarəsində televiziya müxbirlərinə deyib: “Bir müddət əvvəl zəng etdilər, həqiqətən də razılaşmaq istəyirlər. Sadəcə, razılaşmaya dəyərmi, bilmirəm”.
Son iki gecə ərzində ABŞ Hörmüz boğazında gəmilərin atəşə tutulmasına cavab olaraq İrana qarşı zərbələri bərpa edib.
Tramp İranın ticarət gəmilərinə yenidən hücum edəcəyi təqdirdə ABŞ ordusunun daha güclü zərbələr endirəcəyi ilə hədələyib.
Bununla bağlı Tramp cümə axşamı “Truth Social” hesabında yazıb: “Əgər onlar bunu yenidən etsələr, daha da pis vəziyyətdə olacaqlar”.
İran parlamentinin sədri Məhəmməd Bağır Qalibaf ABŞ-ni vəziyyəti daha da gərginləşdirməmək barədə xəbərdarlıq edərək deyib ki, Hörmüz boğazı yalnız Tehranın şərtləri ilə açılacaq.
O, sosial media hesabında yazıb: “Əgər zərbə endirsəniz, sizə cavab zərbəsi endiriləcək. Boş yerə vuruşmayın, yoxsa daha da dərinə batacaqsınız. Hörmüz boğazı yalnız İranın şərtləri ilə açılacaq, Amerika təhdidləri ilə deyil”.
İran Xarici İşlər Nazirliyinin sözçüsü İsmayıl Bəqayi isə bildirib ki, ABŞ-yə öz obyektlərindən İrana hücumlar üçün istifadə etməyə icazə verən dövlətlər ciddi nəticələrlə üzləşəcəklər.
“Amerika-İsrail hərbi təcavüzü üçün Avropada öz ərazilərini, bazalarını və infrastrukturlarını təmin edən tərəflər öz iştiraklarına və sonrakı nəticələrə görə məsuliyyətdən yayına bilməzlər”, - Bəqayi qeyd edib.
NATO-nun baş katibi Mark Ruttenin açıqlamalarına cavab olaraq İsmayıl Bəqayi həmçinin qeyd edib ki, Avropa ölkələri İranla münaqişə ətrafındakı vəziyyətdə neytral qalmayıblar.
Qeyd edək ki, son iki gecə ərzində ABŞ İrana qarşı hücumları bərpa edib. Tehran bu hücumların cavabsız qalmayacağına söz verib.
Mürtəza
