Qızıl üçün yeni rekord proqnoz: 6 300 dollara çata bilər
Ölkə.az xəbər verir ki, bank qızılın bir unsiyasının qiyməti üzrə uzunmüddətli gözləntilərini qoruyub saxlayarkən, investor marağı və mərkəzi bankların alışları ilə bağlı da qiymətləndirmələrini bölüşüb.
2026-cı ilin ilk aylarında yüksəliş trendini davam etdirən qızılın bir unsiyasının qiyməti yanvarın sonunda ilin ən yüksək səviyyəsinə çatıb.
Mart ayının sonundan etibarən isə yüksəliş tempi zəifləyib və qızıl son olaraq bir unsiya üçün 4 170 dollar səviyyəsinə enərək ilin ən aşağı göstəricisini sınaqdan keçirib. Bu dövrdə spot qızıl qiymətləri isə ümumilikdə üfüqi tendensiya nümayiş etdirib.
"JP Morgan"ın Qlobal Araşdırmalar bölməsi qızıl qiymətləri ilə bağlı nikbin proqnozunu qüvvədə saxlayıb. Bankın proqnozuna əsasən, qızılın bir unsiyasının orta qiymətinin 2026-cı ilin son rübündə 6 000 dollara, 2027-ci ilin sonuna yaxın isə 6 300 dollara çatacağı gözlənilir.
"JP Morgan"ın Əsas və Qiymətli Metallar bölməsinin rəhbəri Qreq Şirer bildirib ki, son dövrlərdə investorların qızıla marağı əvvəlki dövrlə müqayisədə zəifləyib.
Qızıl qiymətlərini dəstəkləyən əsas amillərdən biri hesab olunan mərkəzi bankların alışları ilə bağlı rəsmi statistikada yavaşlama müşahidə olunub. Açıqlanan məlumatlara görə, 2026-cı ilin birinci rübündə mərkəzi bankların xalis qızıl alışları 16 ton təşkil edib.
Beynəlxalq Valyuta Fonduna (BVF) bildirilməsi məcburi olmayan birjadankənar (OTC) bazar məlumatları və İsveçrə emal zavodlarının tədarük göstəriciləri isə fərqli mənzərə ortaya qoyur. Həmin məlumatlara əsasən, mərkəzi bankların qızıl alışlarının azalmadığı, əksinə, 2026-cı ilin birinci rübündə 244 tona çatdığı ehtimal edilir.(Qaynarinfo)
