Dünyada elektrikli nəqliyyat vasitələrinin satışı 2 milyona çatıb - HESABAT
Ölkə.az İqtisadiyyat.az-a istinadən xəbər verir ki, bu barədə Londonda yerləşən məlumat analitikası şirkəti "Benchmark Mineral Intelligence" iyun ayı üçün elektrikli nəqliyyat vasitələrinin satış hesaabatını açıqlayıb.
Məlumatlara görə, ötən ay dünyada 2 milyon elektrikli nəqliyyat vasitəsi satılıb. Satışlar illik müqayisədə 7 faiz, əvvəlki aya nisbətən isə 11 faiz artıb.
Qlobal elektrikli nəqliyyat vasitələrinin satışları ilin birinci yarısında 9,6 milyona çatıb ki, bu da illik müqayisədə 2 faiz artım deməkdir.İyun ayında Avropada rekord sayda - 530 min elektrikli nəqliyyat vasitəsi satışı qeydə alınıb. Bu satış həcmi aylıq olaraq 28%, illik olaraq isə 31% artım deməkdir. Yaxın Şərqdəki müharibədən sonra dəstəkləyici tənzimləyici tədbirlər və artan yanacaq qiymətləri Avropada elektrikli nəqliyyat vasitələrinin satışlarının rekord səviyyədə artmasına töhfə verməyə davam edib.
Dünyanın ən böyük elektrikli avtomobil bazarı olan Çində iyun ayında satışlar illik müqayisədə 11 faiz azalaraq 1 milyona düşüb. İlin birinci yarısında satışlar isə ümumilikdə 4,9 milyon təşkil edib ki, bu da ötən ilin eyni dövrü ilə müqayisədə 14 faiz azdır.
Digər tərəfdən, Çinin elektrikli nəqliyyat vasitəsi istehsalçılarının ixracı iyun ayında 500 min ədədlə yeni rekorda çatıb.
Bu dövrdə Şimali Amerikada elektrikli nəqliyyat vasitələrinin satışları ötən ilin eyni ayı ilə müqayisədə 13 faiz azalaraq 130 minə enib. İlin birinci yarısında regionda satışlar illik müqayisədə 20 faiz azalaraq 730 min olaraq hesablanıb.
Xüsusilə ABŞ-də elektrikli nəqliyyat vasitələri üçün təşviqlərin ləğvi satışlara təzyiq göstərməyə davam edir.
Dünyanın qalan hissəsində elektrikli nəqliyyat vasitələrinin satışları iyun ayında illik müqayisədə 98 faiz artaraq 300 minə çatıb. İlin birinci yarısında satışlar 91 faiz artaraq 1,4 milyona yüksəlib.
