14 yaşdan kiçiklər sosial şəbəkələrdən uzaqlaşdırılır? – Cənubi Koreyadan yeni təşəbbüs
Ölkə.az xəbər verir ki, bu barədə ölkənin Rabitə və Yayım Komissiyasının sədri Kim Çen Çul bildirib.
“Biz 14 yaşdan kiçik uşaqların sosial şəbəkələrdə hesab yaratmaq imkanının məhdudlaşdırılmasını, həmçinin 14-19 yaşlı yeniyetmələr arasında bu platformalardan həddindən artıq istifadəyə təşviq edən alqoritmlərin təsirinin azaldılmasını nəzərdən keçiririk”, – deyə "Yonhap" agentliyi komissiya sədrinin sözlərini sitat gətirib.
Kim Çen Çul qeyd edib ki, parlamentdə yetkinlik yaşına çatmayanların sosial şəbəkələrdən istifadəsi ilə bağlı təxminən yeddi qanun layihəsi təklif olunub.
Rəsmi əlavə edib ki, bu məsələyə ehtiyatla yanaşmaq lazımdır. O, buna nümunə olaraq yeniyetmələrin gecə saatlarında onlayn oyunlardan istifadəsinə qoyulan qadağanı göstərib. Belə ki, 2011-ci ildə Cənubi Koreyada 16 yaşdan kiçik şəxslərin gecə saat 00:00-dan səhər 06:00-dək onlayn oyunlara daxil olmasını qadağan edən qanun qəbul edilmişdi. Lakin həmin qanun oyun sənayesinə mənfi təsir göstərdiyi və insanların “əsas hüquqlarını pozduğu” əsas gətirilərək 2022-ci ilin yanvarında ləğv olunub.
Həmidə İbrahimova
