Ermənistan Rusiyadan asılılığı azaldır: Vaşinqton Yerevan hərbi əməkdaşlığında YENİ MƏRHƏLƏ
Ölkə.az xəbər verir ki, səfir İrəvanın artıq ABŞ-dən müdafiə texnologiyaları almaq imkanı əldə etdiyini bildirib.
"Regionda sülhün olmaması bir çox potensial imkanları bloklamışdı. Sülh proqramını həyata keçirməyə başladıqdan sonra rifah gələcək. Biz suverenliyimizi gücləndiririk və Ermənistan üçün daha böyük müstəqilliyə çalışırıq. Daha böyük suverenlik isə tək bir oyunçudan (Rusiyadan) daha az asılı olmaq deməkdir", - deyə səfir qeyd edib.
Uzun müddət yalnız Sovet və Rusiya silahlarına güvənən Ermənistan, son dövrlərdə hərbi tərəfdaşlarını şaxələndirməyə başlayıb. Ölkə artıq Fransa və Hindistan ilə yaxın əlaqələr quraraq bu dövlətlərdən zirehli texnika, artilleriya və raket sistemləri tədarük edir.
Bundan əlavə, cari ilin fevral ayında ABŞ vitse-prezidenti Ceyms Devid Vensin (J.D. Vance) Ermənistana ilk rəsmi səfəri zamanı "V-BAT" pilotsuz uçuş aparatlarının (PUA) alınması ilə bağlı müqavilə imzalanıb. Yaponiya, Niderland və Ukrayna ordularının da istifadə etdiyi bu dronlar Amerikanın "Shield AI" şirkəti tərəfindən istehsal olunur.
Narek Mkrtçyan hərbi sahədəki bu köklü dəyişikliyi belə izah edib: "İndi qapılar üzümüzə açılıb. Onilliklərdən sonra ilk dəfədir ki, ABŞ-dən müdafiə texnologiyaları almaq imkanımız yaranıb. Bu, bizim diversifikasiya (şaxələndirmə) siyasətimizin bir hissəsidir. Hazırda ABŞ də daxil olmaqla, 7-dən çox ölkədən müxtəlif hərbi texnologiyalar alırıq".
Erməni diplomat bu yaxınlaşmanın regiondakı qonşu dövlətləri hədəf almadığını iddia edib: "ABŞ ilə əməkdaşlığımız, Vaşinqtonla münasibətlərimizin gündəliyinin genişlənməsi və ya Avropa İttifaqı ilə strateji məsələlər üzrə sıx dialoqumuz Rusiya, İran, Çin və ya hər hansı başqa bir ölkəyə qarşı yönəlməyib".
Səfir, həmçinin Ermənistanın Amerikanın kiçik modul reaktorlarına, eləcə də ABŞ Dövlət Departamentinin Çin texnologiyasını əvəz etmək üçün irəli sürdüyü süni intellekt və mikroçiplər üzrə qlobal təchizat zənciri yaradılmasını hədəfləyən "Pax Silica" təşəbbüsünə də böyük maraq göstərdiyini vurğulayıb.
Elvin
Ölkə.az
