Astanada uçan taksi havaya qaldırıldı - VİDEO
Ölkə.az oxu.az-a istinadən xəbər verir ki, bu barədə TASS məlumat yayıb.
Bu layihə Çin və Qazaxıstan şirkətləri tərəfindən birgə həyata keçirilib.
"Kazanat" hippodromunun ərazisində reallaşan uçuş və eniş prosesləri şaquli formada icra edilib. Aparat havada 10 dəqiqə qalaraq, iki dövrə vurmaqla ümumilikdə 2.4 kilometr məsafə qət edib. Təhlükəsizlik qaydalarına uyğun olaraq kabinədə sərnişin olmayıb və uçan taksi əvvəlcədən müəyyənləşdirilmiş marşrutla avtomatik rejimdə hərəkət edib.
Uçuş aparatı Astanada baş tutacaq "Gələcəyin oyunları" tədbirində xüsusi eksponat kimi nümayiş etdiriləcək. Ziyarətçilər onu iyulun 29-da və 30-da yaxından izləyə biləcəklər. Sözügedən model beş sərnişin və bir pilotun daşınması üçün uyğunlaşdırılıb. 13 elektrik mühərriki ilə təchiz edilən bu aparat saatda 200 kilometr sürət yığmaq imkanına malikdir və bir dəfə tam şarj olunmaqla 200 kilometrə qədər məsafəyə uça bilir.
Xatırladaq ki, Qazaxıstan ərazisində uçan taksinin ilk sınağı may ayının 19-da "Alatau City" meydançasında (Alatau şəhəri) keçirilmişdi. Həmin ərazidə şəhər hava mobilliyi (Urban Air Mobility) məqsədilə xüsusi eksperimental hüquqi rejim zonası formalaşdırılıb.
