Milyonçu Conson: “Özümü körpə uşaq kimi klonlaşdırdım”

Ölkə.az xəbər verir ki, Conson bunun innovativ müalicələri sınaqdan keçirmək və sonradan transplantasiya üçün orqan yetişdirmək üçün edildiyini iddia edib.

Conson bununla bağlı X (tvitter) sosial mediada yazıb: "Mən özümü yeni doğulmuş kimi klonlaşdırdım... Hələlik bu "Körpə Brayan" Petri qabında yaşayır. Bəziləri üçün bu, qorxulu və ya distopik bir gələcək kimi görünür. Lakin digərləri bunu tibbin təkamülündə qaçılmaz bir addım kimi görəcəklər".

Consonun istinad etdiyi texnologiya elmi ictimaiyyətdə induksiya olunmuş pluripotent kök hüceyrələri (iPSC) kimi tanınır. 

Keçən ay Brayan Conson immun sisteminin səhvən mədəsinin selikli qişasındakı sağlam hüceyrələrə hücum etdiyi sağalmaz otoimmun xəstəlik diaqnozu qoyulduğunu açıqlayıb. Lakin sahibkar süni intellekt və müasir genetik texnologiyalardan istifadə edərək həll yolu tapmaq niyyətində olduğunu bildirib.

"Bu klonla öz donorum ola bilərəm. Üzərimdə terapiyalar sınaqdan keçirə, transplantasiya üçün orqanlar yetişdirə, yeni müalicələr hazırlaya və gənc hüceyrələr yeridə bilərəm. Bu texnologiya qocalmanı geri qaytarmağın yolunu açır. Diaqnoz məni bədənin bərpasında yeni üfüqlər araşdırmağa ruhlandırdı", - Conson vurğulayıb.

Consonun yeni layihəsi internetdə tənqid dalğasına səbəb olub. İzləyicilərindən biri istehza ilə qeyd edib ki, Brayan Conson ölüm qorxusu olan birinə çox pul verdikdə nə baş verdiyinin bariz nümunəsidir.

Qeyd edək ki, biohakerin qeyri-ənənəvi yanaşmasını müdafiə etməsi, şəxsi təcrübələrinin və milyonlarla dollarlıq investisiyalarının bütün bəşəriyyət üçün elmi və tibbi kəşfləri sürətləndirməyə yönəldiyini iddia etməsi ilk dəfə deyil.

Mürtəza