Bir cüt corabı kəsdi, milyard dollarlıq şirkət qurdu
Sahibkarlıq hekayəsi gündəlik həyatda qarşılaşdığı sadə bir problemdən başladı
Ölkə.az Valyuta.az-a istinadən xəbər verir ki, 1971-ci ildə ABŞ-ın Florida ştatında anadan olan Sara Bleykli Florida Dövlət Universitetində kommunikasiya ixtisası üzrə təhsil alıb. Universiteti bitirdikdən sonra müxtəlif işlərdə çalışıb, daha sonra isə ofis ləvazimatları şirkəti olan "Danka"da satış nümayəndəsi və milli satış təlimçisi kimi fəaliyyət göstərib.
Onun sahibkarlıq hekayəsi gündəlik həyatda qarşılaşdığı sadə bir problemdən başladı. Geyimin altında görünməyən, rahat, bədəni daha incə göstərən və açıq ayaqqabılarla geyinilə bilən alt geyimi tapa bilməyən Bleykli bir cüt corabın ayaq hissəsini kəsərək öz həllini yaratdı. O, bu məhsulun başqa qadınlar üçün də faydalı olacağını anlayaraq ideyasını biznesə çevirməyə qərar verdi və bədənə formaverici alt geyim yaratdı.
"Spanx"
2000-ci ildə Sara Bleykli şəxsi yığımlarından 5 min dollar ayıraraq məhsulunu bazara çıxarmağa başladı. Gündüz əsas işində çalışır, gecələr isə parça növlərini araşdırır, patent sənədlərini hazırlayır və məhsulun loqosu üzərində işləyirdi. Patent müraciətini özü hazırlayan Bleykli uzun axtarışlardan sonra məhsulunu istehsal etməyə razı olan fabrik tapdı.
O, məhsuluna "Spanx" adını verdi və reklam kampaniyalarına böyük vəsait xərcləmək əvəzinə ABŞ boyunca mağazaları gəzərək məhsulu şəxsən təqdim etdi. Bleykli "Neiman Marcus" kimi iri pərakəndə satış şəbəkələrinin rəhbərlərinə məhsulu özü nümayiş etdirərək satış şəbəkəsini genişləndirdi.
Opra Uinfrinin dəstəyi uğuru sürətləndirdi
"Spanx" üçün dönüş nöqtəsi 2000-ci ilin sonunda məşhur televiziya aparıcısı Opra Uinfrinin verilişində məhsulu təqdim etməsi oldu. Bundan sonra satışlar kəskin artdı və şirkət qısa müddətdə sürətlə böyüməyə başladı.
Sara Bleykli reklamdan daha çox şəxsi təqdimat gücünə inanırdı. O, televiziya proqramlarında və müxtəlif tədbirlərdə məhsulun modeli kimi özü çıxış edir, brendin tanınmasına birbaşa töhfə verirdi. 2004-2005-ci illərdə Riçard Bransonun təqdim etdiyi "Rebel Billionaire" realiti şousunda ikinci yeri tutması da onun tanınmasına əlavə təkan verdi.
Bransonun hədiyyə etdiyi 750 min dollar mükafatı isə şəxsi məqsədləri üçün deyil, qadın sahibkarların inkişafını dəstəkləyən "Sara Blakely Foundation" fondunun yaradılmasına sərf etdi.
Milyard dollarlıq şirkət və yeni investisiyalar
Artan populyarlıq nəticəsində onilliyin sonuna doğru "Spanx"ın illik satışları yüz milyonlarla dollara çatdı. 2012-ci ildə isə yalnız Sara Bleykliyə məxsus olan şirkətin dəyəri 1 milyard dollar qiymətləndirildi və o, dünyanın ən gənc öz gücü ilə milyarder olmuş qadını adına sahib oldu.
2015-ci ildə Bleykli ABŞ-ın NBA liqasında çıxış edən "Atlanta Hawks" basketbol klubunun investorlarından birinə çevrildi. 2021-ci ildə isə investisiya şirkəti "Blackstone" "Spanx"ın nəzarət paketini təxminən 1,2 milyard dollar dəyərində satın aldı. Bu razılaşmadan sonra Sara Bleykli şirkətin icraçı sədri vəzifəsini icra etməyə başladı.
Dünyanın ən uğurlu qadın sahibkarlıq nümunəsi
Sara Bleyklinin uğur hekayəsi göstərir ki, böyük biznes ideyaları bəzən gündəlik həyatda rast gəlinən kiçik problemlərin həllindən yaranır. Cəmi 5 min dollar sərmayə, şəxsi əzmkarlıq və doğru yanaşma ilə qurulan "Spanx" bu gün dünyanın ən uğurlu qadın sahibkarlıq nümunələrindən biri hesab olunur. Onun yaratdığı fond isə minlərlə qadının öz biznesini qurmasına dəstək verməyə davam edir.
