Parisdə Ermənistan əleyhinə etiraz aksiyası keçirilib
Aprelin 9-da Ermənistanın Parisdəki səfirliyinin önündə Ermənistan ordusunun Azərbaycan-Ermənistan qoşunlarının təmas xətti yaxıınlığında yerləşən yaşayış məntəqlərindəki mülki əhalini hədəf alan son hərbi təxribatlarına etiraz aksiyası keçirilib.
Ölkə.Az xəbər verir ki, aksiya Paris Azərbaycan Evinin təşkilatçılığı, Avropa Azərbaycan Cəmiyyətinin (TEAS) dəstəyi ilə baş tutub. Ermənistan Azərbaycanın mülki əhalisinə qarşı zorakılıq törətməsi ilə qane olmayaraq, 9 aprel tarixində Paris küçələrinə zorakılıq gətirməkdən çəkinməyib.
Belə ki, 20-dən artıq maskalı ermənilərdən ibarət bir qrup ekstremist dəmir çubuqlar, şüşə, ammonium (kimyəvi maddə ) və digər küt alətlərlə silahlanaraq 200-dən artıq azərbaycanlı, Azərbaycanın dostları və beynəlxalq hüquq tərəfdarlarına qarşı zorakılıq tədbiq ediblər. Bu insanlar Parisdə Ermənistan səfriliyinin qarşısında dinc şəkildə etirazlarını bildirmək üçün toplaşmışdılar. Fransa çevik polis alayı ermənilərin hücumunu dəf edib və hazırda hücum edənləri müəyyənləşdirməyə çalışır. Yaralılara yardım etmək üçün təcili tibbi yardım çağrılıb.
Parisdə Azərbaycan Evi tərəfindən təşkil edilmiş bu tədbir diaspora və tələbə qrupları ilə yanaşı Avropa Azərbaycan Cəmiyyətinin (TEAS) Fransa ofisi tərəfindən də dəstək almışdır. Aksiyada Fransadakı türk diasporasının nümayəndələri də iştirak edib. Etirazçılar “Sarqsyan – müharibə cinayətkarıdır”, “Erməni terrorçuları”, “Ermənilər – Qarabağı tərk edin” və “Xocalıya Ədalət” kimi şüarlar səsləndiriblər. Aksiya zamanı Qarabağ Şikəstəsi də səslənib.
TEAS-ın direktoru Lionel Zetter etirazçılar qarşısında çıxış edərək deyib: “Biz beynəlxalq hüquqa inanırıq. BMT Təhlükəsizlik Şurasının 4 məlum qətnaməsi, BMT Baş Assambleyasının 1 qətnaməsi və Avropa Şurasının Parlament Assambleyasının (AŞPA) 1 qətnaməsi vardır. Bunların hamısı bildirir ki, Dağlıq Qarabağ və yeddi ətrafyanı rayon Azərbaycana məxsusdur. Elə bu həftə AŞPA-nın prezidenti Pedro Agramunt demişdir ki, Ermənistan silahlı qüvvələri işğal olunmuş ərazilərdən dərhal çıxarmalıdır. Əgər Ermənistan silahlı qüvvələri qeyri-qanuni olaraq Azərbaycanın suveren ərazilərini işğal etməsəydi, burada münaqişə olmazdı.”
Azərbaycan Evinin prezidenti Mirvari Fətəliyeva: “Biz burada erməni qüvvələrinin yeni hərbi təxribatlarına qarşı etirazımızı bildirmək üçün toplaşmışıq. Bu, elan edilməmiş müharibədir. Burada 1988–94-cü illərdə baş verənlər davam edir. Həmin hərəkətlər Azərbaycan ərazisinin 20 faizinin işğal olunması və bir milyona yaxın qaçqın və məcburi köçkünlərin yaranması ilə nəticələnmişdir. Müharibə qurbanları heç vaxt unudulmamalıdır, xüsusilə Xocalı Qırğınının 613 qurbanı. Bu günə qədər heç nə dəyişməmişdir. Biz ədalətə çağırırıq”.
Daha sonra Mirvari Fətəliyeva şəhidlərin xatirəsini bir dəqiqəlik sükutla anmağa çağırdı.
Nant Azərbaycan-Fransa Mədəniyyəti Assosiasiyasının (ASAF) prezidenti Toğrul Zeynalov: “Biz burada Azərbaycan torpaqlarına qarşı Ermənistanın hərbi təcavüzünə etirazımızı bildirmək üçün toplaşmışıq. Biz Fransada yaşayırıq və Fransa bizim ikinci vətənimizdir. Biz istəyirik ki, Fransa təcavüzə qarşı hərəkət etsin. Yaşasın Fransa, yaşasın Respublika və yaşasın Fransada olan azərbaycanlılar!”
Etirazçılar tələb edirdi ki, Fransa üzərinə bu münaqişədə danışıqlar vasitəsi ilə sülhün əldə edilməsi vəzifəsi qoyulan ATƏT-in Minsk Qrupunun həmsədri – Ermənistan və Azərbaycan arasında Dağlıq Qarabağ münaqişəsinin sülh yolu ilə həllinə dəstək vermək üçün beynəlxalq ictimaiyyəti motivasiya etməkdə daha fəal olmalıdır.
20 ildən çoxdur ki, Ermənistan beynəlxalq hüquqa məhəl qoymur və 1993-cü ildə qəbul edilmiş və Ermənistan silahlı qüvvələrinin Azərbaycan ərazilərini tərk etməyini tələb edən BMT Təhlükəsizlik Şurasının dörd qətnaməsi yerinə yetirilməmişdir. Hazırda minlərlə azərbaycanlı qaçqın və məcburi köçkün olmuş Azərbaycanın müxtəlif yerlərində düşərgələrdə məskunlaşıblar. Elə bu həftə bu düşərgələrin bəziləri Ermənistanın artilleriya atəşinə tutulmuşdur.
Etiraz aksiyasında Fransanın müxtəlif şəhərlərindən - Tur, Bezanson, Dol, Lion, Miluz, Paris ətrafı şəhərlərindən Azərbaycan və Türk diaspor təşkilatlarının nümayəndələri iştirak ediblər.
Çıxışlarda son günlər Ermənistan silahlı qüvvələri tərəfindən atəşkəs rejiminin və beynəlxalq hüquq normalarının kobud şəkildə pozulmasını, Azərbaycanla təmas xəttində təxribatçı cəhdlərin törədilməsini pislənmiş, Ermənistan silahlılarının Azərbaycan torpaqlarından qeyri-şərtsiz çıxarılmasını tələb edilmişdir.
Meydana toplaşan yüzlərlə soydaşımız əllərində Azərbaycan və Fransa bayraqlarını, erməni təcavüzünü pisləyən, Azərbaycan torpaqlarının Ermənistan tərəfindən qeyri-qanunu zəbtinə dair beynəlxalq təşkilatları və ATƏT-in Minsk qrupunu bu haqsizlıqlara biganə olmamağa səsləyən transparantlar tutmuş, Qarabağın və zəbt edilmiş digər rayonların qədim Azərbaycan torpağı oldugunu, Xocalının dinc sakinlərinə qarşı ermənilərin törətdikləri vəhşilikləri pisləyən şüarlar səsləndirmişlər.
Azərbaycan Evinin prezidenti Mirvari Fətəliyeva Fransa rəsmlərinə və şəhər ictimaiyyətinə ünvanlanan müraciətin mətnini oxumuşdur.
Aksiya iştirakçılarının bəyanatını Ermənistan səfirliyinin poçt qutusuna atılıb.
