Baş nazir istintaqla bağlı Niderlanda gedəcək

Malayziyanın Baş naziri Nacib Razak qəzaya uğramış “Boeing 777” təyyarəsinin istintaqı ilə bağlı müzakirələrin aparılması məqsədilə iyulun 30-da Niderlanda səfər edəcək. 

Ölkə.Az xəbər verir ki, səfər zamanı beynəlxalq ekspertlərin təyyarənin qəzaya uğradığı əraziyə baxış keçirməsi ilə bağlı problemin müzakirəsi də planlaşdırılr.

İyulun 25-də Kiyevə və Amsterdama səfərdən qayıdan nəqliyyat naziri Liou Tionq Lay bildirib ki, hazırda qəza rayonuna buraxılış çox məhduddur.

Nazir bəyanatında deyib: “Biz bütün ölkələrin liderlərindən, yerli hakimiyyət orqanlarından qəza rayonuna tam buraxılışın təmin edilməsini xahiş edirik”. Nazir, həmçinin bildirib ki, tədqiqatın gedişində iştirak etmək və həlak olanların şəxsiyyətini təsdiq etmək üçün polis əməkdaşlarının və identifikasiya mütəxəssislərinin yaxın günlərdə Kuala-Lumpurdan yola salınması planlaşdırılır.

“Malayziya Hava Yolları” şirkətinə məxsus Amsterdam – Kuala-Lumpur reysini həyata keçirən “Boeing 777” təyyarəsi iyulun 17-də Ukraynanın Doneçk vilayəti üzərində qəzaya uğrayıb. Göyərtədə olan 298 nəfər həlak olub. Onların əksəriyyəti (194 sərnişin) Niderland vətəndaşlarıdır./azərtac/

Ölkə.Az