Alparslan Çelikin ifadəsinin mətni Rusiya səfirliyinə təqdim edildi
Türkiyə-Suriya sərhədində vurulan rus qırıcısının pilotunu öldürməkdə şübhəli bilinən Alparslan Çelikin verdiyi ifadənin mətni Rusiyanın Ankaradakı səfirliyinə təqdim olunub.
Ölkə.Az xəbər verir ki, bu haqda Çelikin vəkili Murad Üstündağ jurnalistlərə məlumat verib.
"Mənim müvəkkilimin təyyarə vurulan vaxt "atəş açmayın!" deyə qışqırdığı haqda dəlil var. Hadisənin videogörüntüsündə bu var. Belə olan halda o heç vaxt paraşütlə tullanan rus pilota atəş açmazdı. Bundan başqa pilotun düşdüyü yerlə kameraların onu çəkdiyi yer arasında 2-3 kilometr məsafə var. O uzaqlıqda vura biləcək silah isə mənim müvəkkilimdə olmayıb", deyə Alparslan Çelikin vəkili bildirib.
