Türkiyə antiterror qanununu dəyişməkdən imtina etdi
Türkiyə Avropa İttifaqının tövsiyyəsi ilə antiterror qanununu dəyişməkdən imtina edib.
Ölkə.Az xəbər verir ki, viza rejiminin sadələşdirilməsi üçün Türkiyəyə bir neçə şərt irəli sürən Avropa İttifaqının tələbləri Ankara tərəfindən rədd edilib.
"Biz viza rejiminin ləğvi üçün irəli sürülmüş 72 kriteriyanı yerinə yetirmişik, necə ki, söz vermişdik. Amma indi Avropa İttifaqı xahiş edir ki, biz terrorizmlə mübarizəyə yanaşmamızı və bu mübarizə üsulumuzu dəyişək. Bu təkliflər onu göstərir ki, Avropa İttifaqının rəhbərliyi Türkiyədə baş verənlərdən xəbərsizdir. Biz belə bir addımı ata bilmərik və bundan söhbət belə gedə bilməz", deyə Türkiyə prezidentinin mətbuat katibi İbrahim Qalın məsələyə aydınlıq gətirərək bildirib.
Xatırladırıq ki, Aİ qaçqın probleminin həlli üçün Türkiyə ilə vizanı götürmək haqda qərar qəbul etmişdi və bunun qüvvəyə minməsi üçün Ankaraya qanunvericiliyində bəzi dəyişikliklər etməyi tövsiyə etmişdi.
