Çavuşoğlunun sözlərini ultimatum və təhdid hesab etmirik

Almaniya Xarici İşlər Nazirliyinin mətbuat katibi Martin Şefer bildirib ki, Berlin Ankaranın Avropa İttifaqı ilə viza rejiminin liberallaşdırılmasına dair gözləntilərini başa düşür.

Bu barədə Ölkə.Az "Anadolu" agentliyinə istinadən xəbər verir.

Türkiyənin XİN başçısı Mövlut Çavuşoğlu alman qəzetlərindən birinə verdiyi müsahibəsində "Türkiyə vizasız rejimin tətbiqinə dair konkret vaxtın təyin edilməsini istəyir. Vizaların liberallaşdırılması həyata keçirilməsə, Ankara martın 18-dən etibarən Aİ ilə bağlanmış sazişi dayandıracaq", deyə vurğulayıb.

Şefer buna cavab olaraq bildirib ki, Çavuşğolunun sözlərini ultimatum və ya təhdid kimi qiymətləndirmir.

"Hesab edirəm ki, rəsmi Ankara müzakirələr prosesində öz mövqeyini aydın şəkildə bəyan edir. Martın 18-də Türkiyə ilə Aİ arasında imzalanmış saziş yalnız qaçqın böhranı ilə əlaqədar deyil, bu sazişdə vizaların liberallaşdırılması ilə bağlı maddə də yer alıb. Mən Türkiyə üçün bu məsələnin nə qədər əhəmiyyətli olduğunu başa düşürəm", deyə Şifer bildirib.

İlhamə
Ölkə.Az