“Faktiki olaraq ölü idi”
“Özbəkistan prezidenti İslam Kərimov xəstəxanaya yerləşdirildiyi gün beyin ölümü keçirib”.
Bu barədə İslam Kərimovun müalicəsi üçün Finlandiyadan Özbəkistana dəvət olunmuş neyrocərrah Yuha Hernesniemi “Yle” teleradioşirkətinə intervyusunda bildirib.
Həkim bildirib ki, avqustun 27-də tələbələrindən biri İ. Kərimova kömək etmək üçün ona zəng edib: “Mən xarici ölkələrdə çoxlu əməliyyat etmişəm. Bu xahişdə heç bir qeyri-adilik yox idi. Daha sonra mənim üçün xüsusi təyyarə göndərildi, lakin mən Öbəkistana çatanda artıq hər şey üçün gec idi, nəsə etmək qeyri-mümkün idi. Əməliyyatın bu mərhələdə heç bir mənası yox idi, müalicənin davamını da ağlabatan hesab etmirdim. Xəstə faktiki olaraq ölü idi, bu, beyin ölümü idi”, - deyə cərrah söyləyib.
Onun sözlərinə görə, Özbəkistana həmçinin, Rusiya və Almaniyadan da mütəxəssislər gəlmişdi və onlar da eyni rəyi vermişdilər.
“Yle”nin məlumatına görə, Yuha Hernesniemi dünyanın ən aparıcı neyrocərrahlarından biridir. O, 70 mindən çox insanın müalicəsində iştirak edib, 2015-ci ildə təqaüdə çıxıb.
Xatırladaq ki, Özbəkistan prezidenti İslam kərimov sentyabrın 2-də 78 yaşında insultdan dünyasını dəyişib. O, sentyabrın 3-də Səmərqənddə dəfn olunub. (qafqazinfo)
