Obama onu təhqir edən Filippin prezidenti ilə görüşdən imtina etdi

Dünən Filippin prezidenti Rodriqo Duterte ABŞ prezidenti Barak Obamanın ünvanına nalayiq ifadələr işlətsə də, bu gün peşman olub üzr istədi.

Lakin görünür onun üzrü ABŞ prezidenti tərəfindən qəbul olunmayıb.

Ölkə.Az Rusiya KİV-lərinə istinadən xəbər verir ki, Barak Obama Laosda keçiriləcək beynəlxalq sammit çərçivəsində Filippin prezidenti ilə keçirəcəyi görüşü ləğv edib. O, Dutertenin yerinə Cənubi Koreyanın lideri Pak Kın Xe ilə göüşməyə qərar verib.

Filippin prezidentinin onun barəsində söylədiklərinə gəlincə, Obama soyuqqanlı davranaraq özünəməxsus şəkildə cavab verib " Görünür, o koloritli oğlandır. Bu şəraitdə onunla görüşməyi məqsəduyğun hesab etmirəm. Lakin komandamın üzvlərinə göstəriş vermişəm, onlar filippinli həmkarları ilə məhsuldar danışıqlar aparmaq üçün uyğun zaman seçəcəklər"

Filippin prezidenti bildirib ki, işlətdiyi ifadə Barak Obamanın şəxsinə hücum kimi qiymətləndirilməməlidir.

İlhamə
Ölkə.Az