Moldova "Ukrayna ssenarisindən" qorxur

Moldova seçkiqabağı "Ukrayna ssenarisinin" baş tutmasından qorxur.

Ölkə.Az xəbər verir ki, Moldovada 30 noyabr parlament seçkiləri öncəsi vəziyyət gərginləşib. Hökumət nümayəndələri ölkədə kütləvi aksiyaların və etirazların, Rusiya tərəfindən edilən təhdidlərin, eyni zamanda, "Ukrayna ssenarisinin" baş verməsindən narahat olduqlarını bildiriblər.

Moldovanın Liberal-demokratlar partiyasının nümayəndəsi Vadim Pistrinçuk hesab edir ki, seçkilərdə antiavropa yönümlü partiyalar qalib gələrsə, ölkəni etirazlar dalğası bürüyə bilər.

"Bu halda insanlar Avropaya olan maraqlarını bəyan etmək üçün küçələrə çıxacaqlar. Biz Ukraynada baş verən Maydanın ölkəmizdə təkrarlanmasına imkan vermərik", - deyə Pistrinçuk qeyd edib.

"Əgər seçkilərdə antiavropa partiyaları qalib gələrsə, Moldova respublikasında iqtisadi, siyasi və sosial faciə baş verər", - deyə partiya liderlərindən biri bildirib.

Onu da qeyd edək ki, Avropa yönümlü partiyaların qalib gəldiyi təqdirdə belə insanları etirazı istisna edilmir. Belə ki, Moldovanın sosialist və ona qoşulmuş "Vahid Moldova" partiyası bu halda küçələrə çıxacağını bəyan edib.

Rəşid Mustafazadə

Ölkə.Az