“Boko Haram” daha 30 uşaq oğurladı

Terrorçular 17 nəfəri isə öldürüblər

“Əl-Qaidə” terror təşkilatının “Boko Haram” qruplaşması 2009-cu ildən Nigeriya hökumətinə qarşı qanlı mübarizə aparır. Qrupun lideri Əbubəkər Şekau etdiyi son video-müraciətdə oğurladıqları 300 qızı satışa çıxaracağını bildirmişdi.

Nigeriya prezidenti Qudlak Conatan dəfələrlə qızları azad edəcəyini bəyan etsə də, hökumət onların xilasına nail ola bilmədi. Paytaxt Abujada bir qrup valideyn hökuməti laqeydlikdə və qızlarını xilas etmək istiqamətində ləng işləməkdə təqsirləndirdi. Daha sonra isə “Boko Haram”la hökumət arasında anlaşma əldə olunduğu xəbəri yayıldı. Qızların azad ediləcəyi bildirildi. Ancaq bu xəbərdən dərhal sonra anlaşma pozuldu.

“Agence France-Presse”in son məlumatında deyilir ki, “Boko Haram” bazar günü Nigeriyanın bir kəndinə basqın ediblər. Terrorçular 13 yaşından yuxarı oğlanları və 11 yaşından yuxarı qızları özləri ilə aparıblar. Hadisənin baş verdiyi Mafa kəndinin rəhbəri Əlhacı Şettima Mayna agentliyə bildirib ki, kəndən aparılan uzaqların sayı 30 nəfərdir. Kənd ağsaqqalı Mallam Mustafa da faktı təsdiq edib.

Adı çəkilən şəxslər onu da bildiriblər ki, qonşu Ndonqo kəndinə hücum edən “Boko Haram” üzvləri orada 17 nəfəri öldürüb.

Agentlik bildirir ki, 2009-cu ildən bəri “Boko Haram” Nigeriyada bu kimi əməllərlə məşğuldur. Ancaq indiyə kimi onları durdurmaq mümkün olmayıb. (musavat)

Ölkə.Az