Bu ölkədə bir gecədə 3 dəfə hakimiyyət dəyişdi

Burkina-Fasoda hakimiyyət uğrunda mübarizə davam edir.

Ölkə.Az Rosbalt agentliyinə istinadən xəbər verir ki, Burkina-Fasoda hakimiyyəti polkovnik İsaak Zida öz əlinə alıb. Hərbçi bildirib ki, ölkənin idarə olunmasını öz üzərinə götürür.

"Mən, Qərbi Afrika ölkələrinin iqtisadi birliyinə daxil olan ölkələri və dünya birliyini yeni hakimiyyəti anlayışla qarşılamağa və dəstək verməyə çağırıram", - deyə, yeni lider radioda müraciəti zamanı bildirib.

Bir sutkadan da az müddət əvvəl Burkina-Fasonun prezidenti Blez Kompaore irimiqyaslı nümayişlərin fonunda tutduğu vəzifədən istefa etmişdi. Bununla da onun 27 illik hakimiyyətinə son qoyuldu. Xalq cəbhəsi hökuməti 1 oktyabr 1987-ci ildə dövlət çevrilişinin nəticəsində hakimiyyətə gəlmişdi.

Bundan sonra isə silahlı qüvvələrin komandanı olan general Onore Traore özünü ölkənin başçısı elan edib. Əhali isə onun Bleza Kompaorenin köməkçisi olduğunu əsas gətirərək etiraz edib.

Xatırladaq ki, Uaqaduquda kütləvi iğtişaşlar 28 oktyabrda başlayıb.

Rəşid Mustafazadə

Ölkə.Az