MKİ-dən şok ittiham

MKİ Rusiyanı Trampın maraqları naminə ABŞ-da keçirilən prezident seçkilərinə müdaxilə etməkdə ittiham edib.

Ölkə.Az xəbər verir ki, Mərkəzi Kəşfiyyat idarəsi Rusiyanın ABŞ-da keçirilən prezident seçkilərində Trampın qələbə qazanması üçün seçki gedişatına müdaxilə etdiyi qənaətinə gəlib.

Verilən məlumata görə, xüsusi xidmət orqanları Demokratlar partiyasının serverinə daxil olaraq minlərlə məktubu WikiLeaks saytına ötürən və Rusiya hökuməti ilə əlaqələri olan insanların şəxsiyyətini müəyyənləşdirib.

Müxtəlif mətbuat orqanları və FTB dəfələrlə Demokratlar partiyasının serverinin rus hakerləri tərəfindən hücuma məruz qaldığını bildirmişdilər. Mətbuat səhifələrində Rusiyanın ABŞ-da keçirilən seçkilərdə Trampı dəstəklədiyi dəfələrlə vurğulanmışdı.

Bununla belə, başda prezident Obama olmaq şərtilə rəsmi dövlət nümayəndələri bu məsələ ilə bağlı son nəticələrin əldə edilmədiyini bildirib. Rəsmi olaraq FTB istintaqın gedişatı barədə məlumat vermir.

Rəsmi Moskva isə haker hücumlarını və ittihamları boş və mənasız söhbət adlandırıb.

Hikmət
Ölkə.Az