Ermənistanın bu təxribatı KTMT-ya xəbərdarlıqdır
Dekabrın 29-da səhər saatlarında Ermənistan Silahlı Qüvvələrinin kəşfiyyat qrupu Azərbaycan-Ermənistan dövlət sərhədini pozmağa cəhd göstərərkən bölmələrimizin pusqusuna düşüb.
Hadisə nəticəsində Silahlı Qüvvələrimizin hərbi qulluqçusu itkin düşüb.
Baş vermiş hadisə ilə bağlı hərbi ekspert Üzeyir Cəfərov Ölkə.Az-a danışıb:
"Baş verən hadisəyə görə məsuliyyəti ATƏT-in Minsk qrupu daşımalıdır. Həmsədrlər prezidentləri görüşdürməyə çalışırdılar. Prezidentlərin görüşü ATƏT-in Minsk qrupu üçün çox vacib idi. Ermənilərin həyata keçirdikləri təxribatlar uğurla nəticələnmədi. İlin sonudur deyə ermənilər gərgin bir vəziyyət yaratmağa çalışdılar və buna nail oldular. Baş verən hadisə Azərbaycan tərəfinin də bildirdiyi kimi, Azərbaycanla Ermənistan arasındakı dövlət sərhəddində baş verib. Bu məsələ Qarabağla bağlı deyil.
Ermənistan Sank- Peterburqdan məyus halda qayıdıb. Orada Kollektiv Təhlükəsizilik Müqaviləsi Təşkilatına (KTMT) baş katib Ermənistanın nümayəndəsi seçilmədi.
Baş verən təxribat gözlənilən idi. Azərbaycan Müdafiə nazirliyində ermənilərin təxribat törədə biləcəklərinə aid əməliyyat məlumatı var idi. Müdafiə nazirliyi vəziyyətə nəzarət edir. Bu hadisənin davamı gəlməyəcək. Ermənistanın məqsədi o idi ki, təxribatı həyata keçirsin. Ermənistanın bu hadisəni törətməkdə məqsədi KTMT-nin üzvlərinin diqqətini buna cəlb etmək idi. Rəsmi İrəvan KTMT-yə erməni generalının baş katib seçilməməsinə narazılıq etdi. Erməni mətbuatında faktiki olaraq Rusiya, Belarus, Qazaxıstan müsəlman ittifaqı kimi qələmə verilir və bu dövlətlərin Azərbaycanı dəstəklədiyi qeyd edilir.
Yaxın saatlarda vəziyyət sakitləşəcək. ATƏT isə öz yaramazlığını göstərib bəyanat verərək tərəfləri danışığa, sülhə səsləyəcək. Azərbaycan tərəfi bu dəfə ATƏT-in Minsk qrupunun ağzından möhkəm vurmalıdır ki, əgər siz Ermənistanı yerində otuzdura bilmirsinizsə, biz döyüş əməliyatlarına başlayıb torpaqlarımızı işğaldan azad edəcəyik".
Səxavət Məmməd
Ölkə.Az