\"Reina\" qətliamında sirli sifarişçi

Yeni il gecəsi İstanbulun "Reina" gecə klubunda 39 nəfərin ölümünə səbəb olan terror aktının sifarişçisinin kim olduğu müəyyən edilib.

Ölkə.Az xəbər verir ki, hücum "Yusuf Hoca" ləqəbli terrorçu tərəfindən planlaşdırılıb və qırğız terrorçu "Yusuf Hoca" tərəfindən İstanbula gətirilib.

Terrorçunun ailəsi ilə bağlı polisə Konyadan məlumat sızdırılıb. Məlumata əsasən, terrorçu ailəsi ilə birlikdə Konyada yaşayır. Aparılan istintaq zamanı məlum olub ki, terrorçu arvadı və iki övladı ilə birlikdə 20 noyabr tarixində Qırğızıstandan İstanbula, oradan da Ankaraya gedib. 22 noyabr tarixində ailəsi ilə Konyaya gedib. Amma terrorçunun İstanbulda və Konyada 20 noyabr tarixindən əvvələ aid vaxtlardaki görüntülərinə də rast gəlinib. Bu isə onun Türkiyəyə bir neçə dəfə gəlib-getdiyinə işarə edir.

İddialara əsasən, qırğız terrorçunu Konyada "Yusuf Hoca" qarşılayıb və cütlük 29 noyabr tarixində quru yolu ilə İstanbula gedib. "Yusuf Hoca" terrorçunu İstanbulun Zeytinburnu səmtində bir evə yerləşdirib. Qətliam günü taksiyə minən terrorçu sürücünün mobil telefonundan kiməsə zəng edib.

Hücumdan sonra yenidən taksiyə minən terrorçu pulunun klubda əynindən çıxartdığı gödəkçənin cibində qaldığını başa düşən kimi gediş haqqının dostları tərəfindən ödəniləcəyini deyib. Sürücünün mobil telefonundan bir nömrəyə zəng etsə də, o nömrəyə zəng çatmayıb. Taksi sürücüsü onu avtomobildən endirib. O gündən sonra o nömrəyə hələ də zəng çatmır. Polis əməkdaşları "Yusuf Hoca"nı axtarır.

Hikmət
Ölkə.Az