ABŞ ilə İran arasında müharibə başlanır?

Bu barədə tanınmış politoloq Zərdüşt Əlizadə Ölkə.Az-a açıqlamasında bildirib. Onun sözlərinə görə, Trampın hədələrinə baxmayaraq, İran heç vaxt onlara tabe olmayacaq.

“Əgər tərəflərin mənafeyi baxımından danışsaq, nə İrana, nə də ABŞ-a müharibə əl vermir. Amerika İranı hədələyir, məcbur etmək istəyir ki, ona tabe olsun. Amerikanın göstərişlərilə oturub dursunlar. İran hökuməti isə deyir ki, qədim, böyük və güclü dövlətik. Nə üçün ABŞ-a tabe olmalıyıq? İranın öz məqsədləri, mənafeyi var. Amerika ona diqtə edə bilməz. Dünyada ABŞ-ın diqtəsilə oturub-durmayan az sayda dövlət var. Onlardan biri də İrandır. İndi də Tramp dünyaya görk olmaq üçün ən zəif saydığı İranı təhdid edir. Cənubi Koreyaya hücum etsə, onların ATOM silahı var. Koreya bu silahı Yaponiyaya atsa, Amerika üçün böyük itkidir”, - deyə Zərdüşt Əlizadə  bildirib.

Ekspertin sözlərinə görə, İranın nüvə silahı yoxdur deyə, Tramp cəsarətlənib:

“Tramp anlamır ki, İranın nüvə silahı olmasa da, onların güclü ordusu var. Bundan başqa, İranın əli çatacaq güclü yerlərdə, Səudiyyə Ərəbistanında, Bəhreyndə, Küveytdə, İraqda, Əfqanıstanda, Suriyanın müxtəlif yerlərində Amerikanın silahlı qüvvələri yerləşir. İranın isə ora əli çatır. Əgər Trampın və ətrafındakı komandasının ağılları varsa, problemləri sövdələşmələrlə, danışıqlarla həll etsinlər. Necə ki, bundan əvvəl nüvə silahı məsələsi həll edilmişdisə, bu problem də elə çözülməlidir. Amma onların diqtə etmək cəhdləri, özlərini ötkəm aparmaları düzgün deyil. Tramp deyir ki, İranın raket silahını sınaqdan keçirtməyə haqqı yoxdur. Niyə haqqı yoxdur? Sənin var, İranın yox? Trampa deyən lazımdır, sən “Allahın xalası oğlusan?”. İran İsrail təcavüzünə müqavimət göstərən ərəblərə kömək etməməlidir. Niyə? İsrailin təcavüz etməyə haqqı var, ərəblərin müqavimət göstərməyə haqqı yoxdur? Bu ABŞ rəhbərliyi tərəfindən ağayanalıq iddialarıdır. İrana bu nömrələr keçməyəcək. İran ABŞ-a tabe olmayacaq. Tramp özlərini biabır edir. ABŞ-ın dünyada olan hörməti aşınır”.

Ziya Səccad
Ölkə.Az