Tramp Bəşər Əsəd rejiminə qarşı hərbi əməliyyata hazırlaşır?
"Ölkə.Az" xəbər verir ki, bu barədə dünya siyasətçiləri müxtəlif fikirlər səsləndiriblər. Xarici mətbuatda yayılan iddialara görə, İdlib vilayətində baş verən kimyəvi faciə ilə bağlı ABŞ Suriyaya qarşı hərbi əməliyyatlara başlayacaq. Deyilənlərə görə, D.Tramp bu barədə Konqres ilə razılaşma əldə edib.
Donald Tramp isə deyilənləri təqzib edib. Amerika rəhbəri jurnalistlərə açıqlamasında bildirib ki,Suriya hökumətinə qarşı hərbi əməliyyatların keçirilməsilə bağlı konqres üzvlərilə danışıq aparmayıb.
Qeyd edək ki, Suriyanın İdlib vilayətində B. Əsəd rejiminə aid qırıcıların həyata keçirdiyi hava hücumları nəticəsində kimyəvi anbar zədələnib. Nəticədə ərazidə 100-dən çox insan ölüb. 500-dən çox adam yaralanıb.
Rusiya Suriyanın İdlib vilayətində baş verən kimyəvi qətliamla bağlı açıqlama verib. Açıqlamaya əsasən kimyəvi zəhərlənmənin səbəbi müxaliflərə məxsus kimyəvi silah anbarının Əsəd rejiminə aid qırıcıların həyata keçirdiyi hava hücumları nəticəsində zədələnməsidir. Açıqlamanı Rusiyanın müdafiə nazirliyi verib. Nazirlik rejimə məxsus təyyarələrin bombaladığı şəhərdə müxaliflərə aid kimyəvi silah anbarının zədələndiyini və bu səbəbdən zəhərli qazın sızmasının baş verdiyini bildirib. Rusiya müdafiə nazirliyi isə dünən açıqlama verərək hava hücumunda rus qırıcılarının iştirak etmədiyini bildirmişdi.
Hadisədən sonra ABŞ prezidenti Donald Tramp ilk açıqlamasında Suriyada baş verən kimyəvi hücuma görə Ağ Evin keçmiş rəhbərinin düzgün olmayan qərarları nəticəsində belə bir faciənin yaşandığını qeyd edib. Tramp deyib: "ABŞ müttəfiqləri ilə birlikdə bu hücumu müzakirə edir. Bəşər Əsədin bu dəhşətli hərəkəti keçmiş administrasiyanın zəifliyi və qətiyyətsizliyinin nəticəsidir".
Trampın sözlərinə görə Barak Obama 2012-ci ildə kimyəvi silah tətbiqinə dair "qırmızı xətt" yaradacağını bildirsə də, heç nə etməyib.
ABŞ-ın dövlət katibi Reks Tillerson da əmindir ki, Suriya prezidenti qəddarlıq, həyasızlıq və barbarlıq nümayiş etdirir. Onu müdafiə edənlər də, yəni Rusiya və İran insanların ölümünə görə mənəvi məsuliyyət daşıyırlar.
Ziya Səccad
Ölkə.Az
