Obama miqrantları xilas etdi

Obamadan 5 milyon miqranta böyük jest.

Ölkə.Az ABŞ mətbuatına istinadən xəbər verir ki, ABŞ-da qanunsuz olaraq yaşayan təxminən 5 milyon şəxs deportasiya edilməkdən xilas olub. Belə ki, ABŞ prezidenti Barak Obama ölkəsindəki immiqrasiya sisteminə köklü dəyişikliklər gətirən bir sıra qərarlar açıqlayıb.

Yeni qərarlara görə, ABŞ-da 5 ildir yaşayan ana və atalar, eyni zamanda, vətəndaş ya qanuni yaşama hüququna sahib uşaqları olan xaricilərə müvəqqəti yaşayış icazəsi veriləcək. Bu vəziyyətdə olan təxminən 5 milyon şəxs qanuni olaraq iş haqqı da qazanacaq, lakin səs verə bilməyəcək. ABŞ prezidenti Barak Obamanın immiqrasiya islahatına respublikaçılar reaksiya göstərib.Obamanın Konqresin icazəsi olmadan aldığı bu qərarlarla səlahiyyətlərini aşdığı iddia edilir.

Xatırladaq ki, ABŞ-da hal-hazırda cəmi 11 milyon şəxsin qanunsuz olaraq yaşadığı təxmin edilir. Onu da bildirək ki, ABŞ-da çoxlu sayda azərbaycanlılar da yaşayır. Əsasən ABŞ-ın Nyu-York, Vermont, Arizona, Florida, Ohayo, Konnektikut, Nevada, Texas, İllinoys kimi ştatlarında yaşayan azərbaycanlıların 30-a yaxın ictimai birliyi, bir jurnalı və bir televiziya kanalı fəaliyyət göstərir. ABŞ dövlət departamentinin verdiyi məlumata görə, Azərbaycan müstəqillik əldə etdikdən sonra 5 553 azərbaycanlı ABŞ vətəndaşlığına keçmişdi.

ABŞ-a gələn ilk azərbaycanlı Mirzə Əli Əkbər olmuşdur. O, 1912-ci ilin 7 iyun tarixində Böyük Britaniyanın Liverpul dəniz limanından Mauretania gəmisi ilə Ellis adasına gəlmişdir

Rəşid Mustafazadə

Ölkə.Az