Putin ABŞ-ı Bəşər Əsədə qarşı provokasiya aparmaqda günahlandırıb
“Ölkə.Az” xəbər verir ki, bu barədə Putin “Figaro” qəzetinə verdiyi açıqlamada bildirib. Onun sözlərinə görə, ABŞ-ın bu iddiası provokasiyadır.
“Amerika hökumətinin Suriya ordusunun xalqa qarşı kimyəvi silahdan istifadə etməsilə bağlı səsləndirdiyi fikirlərdən sonra dərhal araşdırmalara başladıq. Bizim mütəxəssislərlə Amerikanın mütəxəssisləri ərazidə müxtəlif yoxlamalar apardılar. Analizlər götürüldü. Lakin heç bir kimyəvi maddə tapılmadı. Eləcə də, ərazidən kimyəvi xarakterli silahlar aşkarlanmadı”, - deyə Putin bildirib.
Rusiya rəhbərinin sözlərinə görə, bu ittihamlar Bəşər Əsəd rejiminə qarşı düşünülmüş təzyiqlərdir:
“ABŞ hökumətində heç bir sübut yoxdur ki, Bəşər Əsəd qüvvələri xalqa qarşı kimyəvi silahdan istifadə edib. Düşünürəm ki, bu Amerikanın yeni oyunudur. Bu ittihamlarla istəyirlər ki, Əsəd hakimiyyətini gözdən salsınlar. Mən də razıyam ki, xalqa zülm edən rəhbər cəzalandırılmalıdır. Lakin bu sübut olunmalıdır”.
Putin bildirib ki, Fransa prezidenti Emmanuel Makron ilə Parisdəki görüşü zamanı bu məsələ barədə də müzakirələr aparıb. Makronla birlikdə Suriyada “qırmızı xətt” məsələsi araşdırılıb.
Qeyd edək ki, mayın 29-da Fransa prezidenti Emmanuel Makron və Rusiya prezidenti Vladimir Putin görüşüb. Görüş Parisdə bağlı qapılar arxasında 3 saata yaxın davam edib.
Xatırladaq ki, Suriyanın Xan-Şeyhun yaşayış məntəqəsinə kimyəvi hücum aprelin 4-də baş verib. Hadisə nəticəsində 80-dən çox insan ölüb, 500-dən çoxu xəsarət alıb. Suriya ordusunun komandanlığı və silahlı müxalifət qüvvələri bir-birini kimyəvi silahdan istifadə etməkdə ittiham edib.
Bundan sonra aprelin 7-ə gecə ABŞ-ın Aralıq dənizindəki hərbi gəmilərindən Əsəd ordusuna aid Şayrat aviabazasına 59 raket buraxılıb. Nəticədə aviabazanın uçuş-enmə zolağı, təyyarələrin dayanacağı və yanacaqdoldurma kompleksləri vurulub. Homs qubernatoru zərbə nəticəsində 5 hərbçi və 2 mülki şəxsin öldüyünü bildirib. Tramp Bəşər Əsəd rejimini aprelin 4-də İdlib əyalətində kimyəvi silahdan istifadə etməkdə ittiham edib. Tramp, raket zərbəsinin kimyəvi silahdan istifadənin təkrarlanmasının qarşısını almaq məqsədilə endirildiyini deyib.
Ziya Səccad
Ölkə.Az
