Ermənistanda bank rəhbərini tapança ilə başından vurdular

Ermənistanın paytaxtı İrəvan şəhərində "Ameribank"ın filial rəhbəri müştəri tərəfindən yaralanıb.

“Ölkə.Az” xəbər verir ki, hadisə günorta saatlarında küçədə baş verib. Komitas küçəsində adı açıqlanmayan şəxs bankdan atasının adına olan kartı götürmək istəyib. Lakin bank əməkdaşları kartı həmin şəxsə verməkdən imtina edərək bildiriblər ki, bunun üçün müştəri özü banka gəlməlidir.

Bu zaman həmin şəxs bank əməkdaşları ilə mübahisə edib. Mübahisə zamanı filialın müdiri həmin şəxsə yaxınlaşaraq, vəziyyəti izah etməyə çalışıb. Nəticədə müştəri onu təhqir edib və onu binadan kənarda məsələni həll etməyə çağırıb.

Küçəyə çıxan bank filialının rəhbəri müştəri ilə əlbəyaxa dava edib. Müştəri belində gizlətdiyi tapançanı çıxararaq müdirin başına zərbə ilə vurub.

Hadisə yerinə polis çağrılıb. Hadisə yerinə gələn hüquq-mühafizə orqanlarının əməkdaşları həmin şəxsi tutublar.

Hazırda cinayət törədən şəxs polis bölməsində dindirilir. Faktla bağlı araşdırmalar aparılır.

Ziya Səccad
Ölkə.Az