Putin NATO-nu ABŞ-ın “oyuncağı” adlandırıb

“Ölkə.Az” xəbər verir ki, Putin bu barədə Oskar mükafatına layiq olan məşhur amerikalı kinorejissor Oliver Stouna verdiyi müsahibədə deyib. Putin tanınmış kinorejossora böyük müsahibə verib. Müsahibə iyunun 12-15-də Amerikanın “Showtime” kanalında yayımlanacaq filmdə yer alacaq.

Putin müsahibəsində bildirib ki, ABŞ-ın tərəfdaşları yoxdur, təkcə vassalları var.

“Bu gün NATO ABŞ-ın xarici siyasətdə üstünlük əldə etməsi üçün bir alətdir. Orada tərəfdaşlıqdan söhbət gedə bilməz. ABŞ-ın tərəfdaşları yoxdur, təkcə vassalları var”, - deyə Putin bildirib.

Onun sözlərinə görə, NATO-ya üzv ölkələrin hamısı elə ABŞ-ın təzyiqi altındadırlar:

“NATO-ya üzv olan ölkələr təşkilatın lideri olan ABŞ-a qarşı etiraz edə bilmirlər. Onlar ABŞ-ın bir növ təzyiqi altında olurlar. Biz isə bununla razı deyilik. Bu səbəbdən də, biz ABŞ-dan müdafiə tədbirləri görməliyik. Çünki Amerikanın raketləri bizim üçün təhlükə yaradır. Hazırda vəziyyət qəlizdir”.

Qeyd edək ki, kinorejissor Oliver Stoun Rusiya prezidenti Vladimir Putin haqqında film üzərində işləyir. Filmdə Putinin 2000-ci ildə ilk dəfə Rusiya prezidenti seçildikdən sonra dünyada baş verən hadisələrə münasibəti göstəriləcəkdir.

O.Stoun kəskin siyasi mövzularda filmlər çəkən rejissor kimi məşhurdur. Onun qəhrəmanları arasında ABŞ prezidentləri Riçard Nikson, Con Kennedi, Corc Buş var.

Ziya Səccad
Ölkə.Az