Reks Tillersondan ərəb dövlətlərinə mesaj: “Tövsiyə edirik ki, ...”
"Ölkə.Az" xəbər verir ki, bu barədə Amerikanın dövlət katibi Reks Tillerson bildirib. Onun sözlərinə görə. Amerika ərəb ölkələri arasında yaranmış problemin tezliklə həll olunmasını istəyir.
“Biz Bəhreyn, Misir, BƏƏ və Səudiyyə Ərəbistanı hökumətlərinə müraciət edirik ki, Qətərə qarşı tətbiq edilən sanksiyaları aradan qaldırsınlar. Ölkələr arasında diplomatik krizisə son qoyulsun”, - deyə Reks Tillerson bildirib.
Onun sözlərinə görə, ərəb ölkələri ilə Qətər arasında gərginlik ABŞ və onun rəhbərlik etdiyi koalisiya qüvvələrinə İŞİD terror təşkilatı ilə mübarizə aparmaqda mane olur.
Reks Tillerson əlavə edib ki, ABŞ həmçinin Qətərə də qonşularla münasibətləri yaxşılaşdırmağı tövsiyyə edib:
“Biz istəyirik ki, regionda sakitlik olsun. Sakitliyi təmin etmək üçün sakit dialoq və qarşılıqlı anlayış göstərmək lazımdır. Biz regionda gərginləşmənin qarşısını almaq üçün münasibətləri qaydasına salmağı tövsiyə edirik. Qətər öz qonşuları ilə anlayışlı davranmalıdır. Qonşu dövlətlərin istəyi nəzərə alınmalı və qarşılıqlı münasibətlər qurulmalıdır”.
Qeyd edək ki, Ərəb ölkələri Qətərlə diplomatik münasibətləri kəsib. Bəhreyn, Misir, BƏƏ və Səudiyyə Ərəbistanından sonra Liviya və Yəmən də Qətərlə diplomatik münasibətləri dayandırıb. Bundan başqa İŞİD-ə qarşı aparılan islam hərbi koalisiyasında Qətərin iştirakı da dayandırılıb.
ABŞ prezidenti Donald Tramp Qətər ilə ərəb dövlətləri arasında yaranmış münaqişəni izləmək və problemin həllində vasitəçi olmağı Amerikanın dövlət katibi Reks Tillersona tapşırıb.
Ziya Səccad
Ölkə.Az
