Serj özünə türmə açdı

Yeni il ərəfəsində Ermənistanda Avropa standartlarına uyğun gələn ilk həbsxana açılıb. Hadisə ilə bağlı keçirilən təntənəli mərasimə nəinki yüksək çinli məmurlar, həm də erməni dövlətinin başçısı Serj Sarkisyan özü gəlmişdi. Sən demə, həbsxananın açılışı Ermənistan üçün çox önəmli hadisə imiş. 

İndiki prezident, çox saylı vədlərinə baxmayaraq, Ermənistan əhalisinin ağır həyatını azacıq da olsun, yünülləşdirmək üçün heç bir iş görməyib. Amma yeni tikilmiş həbsxanada isə dustaqlar özlərini Avropadakı kimi hiss edəcəklər. 

Statistika xidməti, təbii ki, Ermənistanınkı, bildirir ki, yoxsulluq həddindən aşağı yaşayan insanların sayı 300 mindən çoxdur. Erməni nəşrləri artıq həyəcan təbili çalmağa başlayıblar - dekabrın 1-dən ərzaq məhsullarının qiyməti yetərincə artıb. Deməli, çox yoxsulların sayı daha da artacaq. 

Amma yüzlərlə dustaq öz cəzasını ölkə tərəfindən açılmış çox rahat həbsxanada çəkəcək. Azadlıqda qalan yerliləri, yəqin ki, onlara həsəd aparacaqlar. 

Xalq demişkən, heç kimə rişxənd eləmə, öz başına gələ bilər. Yəqin buna görədir ki, bu müdrik kəlama riayət edən məmurlar məxsusi olaraq yeni həbsxanaya baxmağa gəliblər. Öyrənmək istəyirlər ki, görəsən, Avropa standartlarına tam uyğun gəlirmi, komfortludurmu, əlavə hansı rahatlıqları təmin etmək lazımdır? Axı heç kim istisna etmir ki, onların bir neçəsi bu Avropa səviyyəli müəssisənin sakininə çevriləcəklər. 

Amma üstünə hər küncdən "Sarkisyan, çıx get!" qışqırılan bir prezidentin başına nə gələcək, indidən demək çətindir. Amma məsələ üzərindən düşünmək, hər həlda, çox maraqlıdır. (anspress)

Ölkə.Az